Baits’okoli ba sebeletsang toropong ea Maseru, ba re Covid-19 e ba behile tsietsing.

ET2P6tsWsAEnsKx

Baitšokoli ba sebeletsang toropong ea Maseru, ba re Covid 19, e ba behile tsietsing, hobane ha mesebetsi e ka koaloa ho latela litlaleho tsa mahlatsipa a eona, ba tlilo hloka bareki kaha baitšokoli ba ja lipokothong tsa basebetsi.

Ea buileng lebitsong la bona, monghali Tšolo Lebitsa, o itse kaha Afrika Boroa e se e phatlalalitse ka poresidente ea eona hore baahi ba eona ba ipoloke malapeng, Lesotho mona ho ka ’na haeba joalo, ’me bona ba se ba ntse ba le ka mosing.

Letsosa o re tonakholo Thabane o fositse molao oa prorogation

Min-of-Education-Motlalentoa-Letsosa-1

Mokhethoa oa Qalabane, Monghali Motlalentoa Letsosa, o re Tonakholo ea naha ena e lobile ts’ebeliso ea molao oa motheo, temaneng ea prorogation, ka lebaka leo, o na le tumelo ea hore lekhotla le phahameng le tla lumella ba qositseng Tonakholo ka eona taba eo, e leng Toala le Manasi.

A bua ho Probono ea Labobeli la beke ena, monghali Letsosa o itse haeba lekhotla la Molao oa Motheo le ka lumellana le bangosi, le tla khalemela tonakholo le be le hlakole phatlalatso ea prorogation ena e seng e koetse molomo oa sechaba sa Basotho, ka ho bipetsa Lekhotla la Sechaba.

Hape, o re ha lekhotla le ka lumellana le tonakholo, ke ho bolela hore prorogation eo, e tla tsoelapele ka nako ea likhoeli tse tharo tse latellanang ho tloha ka Labohlano le fetileng, ’me polelo ea likhakanyo tsa lichelete e neng e se e ntse e tšohloa ke paramente e tla oelella, e hloke ho qaloa bocha kamor’a likhoeli tse tharo tsa prorogation.

Tonakholo ea Italia e lla sa ’mokotsane e kopa thuso ho Ramaseli

stream_img

Tonakholo ea Italia, monghali Giuseppe Conte, e tlalehoa e eme hlooho ntsi, e lla sa ’mokotsane, e re ba lekile sohle se matleng a bona ho thibela Corona le ho alafa bao e seng e fihlile ho bona, empa ba feletsoe ke maqheka, ba se ba kopa namo ea Molimo o matla ohle.

Naha ea habo e tlalehoa e se e e-na le batho ba fetang likete tse mashome a tšeletseng ba tšoaelitsoeng, athe ba fetang likete tse tšeletseng, ba se ba ile ha mosima ha o tlale.

E ’ngoe ea lingaka tsa naha eo, e neng e sa lumele boteng ba Molimo ka lebaka la lithuto tsa saense, e re kamor’a ho alafa moruti ea telu-putsoa, ea shoeletseng matsohong a bona, e sokolohile, bopaki ba Monna eo oa Molimo bo mo tiiselitse hore hona le bophelo kamor’a lefu.

Sena, ngaka e re se tsoetsoe ke see monna-moholo a neng a hlola a ba bobelletse sona, ka Molimo oa bible, le ho mo bona a se na letsoalo la lefu, hoo a shoeleng sefahleho sa hae se elile, a bonahala a thabetse tsela

Lehlohonolo Scott le ’m’ae ba fumanoe ba le molato ke lekhotla le phahameng

High Court of Lesotho

Lehlohonolo Scott le ’m’ae ba fumanoe ba le molato oa liretlo tsa Koalabata tse etsahetseng ka mongoaha oa 2012, ke Lekhotla le Phahameng la Lesotho, ka Labobeli la beke ena.

Lekhotla le fumane Scott a le molato liqosong tse tharo, tsa liretlo tsa Moholobela Seetsa le tsa Kamohelo Mohata, le ho thoba chankaneng e kholo ea Maseru.

Moahloli, Teboho Moiloa, o itse bopaki bo tšoaselletsang ’Malehlohono le lefu la Mohata bo’a fokola, empa Lekhotla le lumela hore o bile le ’momori, ha mofung oa bobeli teng, a hlile a bile le kobo ea bohali ka ho se tsotelle.

Litopo tsa bahlankana bana li ne li fumanoe li ntšitsoe botona, lipelo ka bobeli li sehiloe qetellong, ’moho le libete, ’me ho fihlela lena, ha ho tsejoe moo likaroloana tseo li leng teng.

Lekhotla le itse ke leshano hore Scott o koetetsoe chankaneng, empa le lumellana le bopaki ba hore o thusitsoe ke tse ling tsa liofisiri tsa lichankana ho thoba, ka hona le tjebela matjoing mepoto eo a e buileng ho itšireletsa.

Lekhotla le itse le tla fana ka nako ee Lehlohonolo Scott le ’m’ae ba tla e qeta chankaneng.

Moahloli Teboho Moloa o bile a ekeletsa ’Malehlohonolo beile, ka hore a tle a tle letsatsing leo ho tla nka sekoebo.

Banka e Kholo e sireletsa Moruo khahlanong le COVID-19

Dr. A. R. Matlanyane, Governor of the Central Bank of Lesotho

MASERU — Komiti ea Banka e kholo ea Lesotho, e alositseng botsitso ba maemo a litheko (MPC), e nkile qeto ho theola sekhahla sa tsoala sa kalimo sa Banka e’o (CBL rate) le ho nyolla sesiu sa Lesotho sa lichelete tsa machaba (NIR Target Floor), ka sepheo sa ho tsosolosa moruo oa naha, ka Lapele la beke ena, tulong ea ts’ohanyetso, e bakiloeng ke seoa sa Corona.

Sekhahla sa tsoala sa kalimo sa Banka e kholo se theohile ho tloha ho 6.25 ho ea ho 5.25 lekholong, boleleng ba selomo. Sesiu sa naha sona, se nyolohetse ho makholo a ts’eletseng a mashome a ts’eletseng ho tloha ho makholo a ts’eletseng a mashome a mararo a li dolara tseo ($630 – $660 million).

Ho theoha ha sekhahala sa tsoala seo li banka se kalimang ka sona, Bankeng e kholo ho tla theola sekhahla seo bahoebi le baji ba alimang ka sona libankeng, le ho nyolla sekhahla sa ts’ebeliso ea chelete ka hara Moruo – ka ha litheko tsa lijo le lithlaisoa tse fapakaneng li lebeletsoe ho theoha ke qeto ena.

Nyollo ea sesiu sa Lesotho sa lichelete tsa machaba, ho bolela hore Basotho ba tla ba le chelete e lekaneng ho reka thepa ea ts’ebetso ka ntle ho naha ka bobebe.

Holima qeto tsena tse peli tse kholo, Banka e kholo ea Lesotho e e-ntse khoeletso ea hore Basotho ba ‘ne ba theohele e le ho qoba ho nyotobela hoa moruo, nakong ena e thata. Mookameli oa Banka, Dr. Rets’elisistoe Matlanyane, o supile hore Lesotho ha le e so be le motho ea phatlalalitsoeng se-molao a e-na lefu lena, ka hona Basotho ba ‘ne ba theohele ba ipapisitse le lipehelo tsa ‘muso le machaba, tsa ho itlhokomela. Tlaleho ka Mokholoane Ramainoane

Nyeoe ea Lehlohonolo Scott ha e-ea tsoelapele kajeno

Lehlohonolo Scott

Kahlolo nyeoeng ea Lehlohonolo le ’m’ae, ’Malehlohonolo Scott, ba qosoang ka liretlo tsa Koalabata, Berea, e se e tla fanoa ka Labobeli la beke ena, ka lebaka la bosieo ba ’Malehlohonolo ka mabaka a sa tsejoeng, ke lekhotla le phahameng, ’muelli oa hae le eena mora.

Moahloli Teboho Moiloa, o ile a botsa Scott hore na o qetetse neng ho kopana le ’ma’e le moholoane oa hae, a fetola ka hore esale a qetela ho ba bona ka Tšitoe ea ngoahola, ha ’ma’e a ne a hloleha haholo ke bokulo.

Adv. Thulo Hoeane o boleletse lekhotla le phahameng hore mohala oa ’Malehlohonolo ha o sa fumaneha, ’me o bile a laeloa ke lekhotla ho tsoma moo bao ba ka fumanoang teng.

Hona lekhotleng leo nyeoe ea litho tsa sesole sa Lesotho tse leshome, tse qosoang ka litopo tsa Ha-Mohale e chechetse mafelong a Phato ho fa mofapahlooho monyetla oa ho finyeletsa tse ling tsa lipampiri ho liakhente tsa baqosuoa. Nyeoe ena e mametsoe ke Moahloli Kabelo Lebotse. Tlaleho ka Relebohile Lengau

Nyeoe e hlahletsoeng ke Matoala le Manasi e chechisitsoe ke Lekhotla la molao oa motheo

High Court of Lesotho

Lekhotla la molao oa motheo ka Lapele lena le chechiselitse nyeoe e hlahletsoeng ke Matoala le Manasi a tsekang ho re tonakholo Motsoahae Thabane o fanyehile paramente ka Thoko ho molao ho letsatsi la Boraro la ‘Mesa.

Lekhotla le bopiloeng ka baahloli Sakoane J, Mokhesi J le Banyane aj le laetse mahlakore a liakhente ka bobeli ho finyeletsa lipampiri tsa likhang tsa ona pele ho letsatsi leo, molemong oa hore nyeoe ena e tle e mamelloe hong ebe e feele.

Tlaleho ka Relebohile Lengau.

Moreki o laela feme ho emisa tse’ebetso, ke Corona.

14093613796_a964c8ccb7_b
Water Projects, Lesotho. The Shining Century Textile company in the Maseru Industrial area. Textile companies have a high water usage and Metolong Dam will supply both industrial and domestic demands. Textile companis also employ a great number of people. As with many other companies in the industrial areas Shining Century have a battery of water storage tanks on the property. Photograph : John Hogg

Mekhatlo e mene ea basebetsi, e ile ea memeloa kopanong e potlakileng ke feme ea lesela le liaparo e Ha Thetsane, Maseru ho ea shebisana lengolo la moreki ea e laetseng ho emisa ka tšebetso hang-hang nako ea libeke tse peli ka lebaka la seoa sa kokoana-holoko ea Corona.

Mekhatlo ea NACTWU, UNITE, IDUL le Lentsoe La Sechaba e ile ea lemoha ho antšoa phooko ke mohiri kaha a ne a batla hore basebetsi ba phomole nako e telele haholo, ebile ba sa lefshoe letho khahlanong le se boletsoeng ke moreki.

Ka hona taba eo, e ile ea halefisa liofisiri tsa mekhatlo ka le reng li batla mong’a feme ka seqo ea ileng a re o phathane, empa tsa makatsoa ke ho bona letona la Thuto le Koetliso le kena bobeli bo ja lekomo bo ikoaletse ka ofising, ka mor’a moo la ikela.

Sena se ile sa baka hore mekhatlo e re setsoeng ke Ha-Molapo hore e lumellane le hore basebetsi ba lule hae, nako e kaalo ba sa lefshoe, empa a ba lefe halofo ea nako eo ba tla e lula hae, a sa etseng, joalo o tla bona tosa le malinyane. Tšepang Makakole

Tonakholo e phatlalalitse qomatsi khahlanong le Corona Virus

ERhxaUPVUAEsCc5

Tonakholo ea Lesotho, Dr. Motsoahae Thomas Thabane, e phatlalalitse qomatsi khahlanong le Corona Virus ka Laboraro lena. Likolo li tla koaloa ka Labone la beke ena, ha ho sa lebelletsoe batho ba fetang mashome a mahlano ho khobokana hammoho, matlo a mothamahane a tla koaloa ka hora ea botšelela mantsiboea, ho sa beng joalo, Sesole le Sepolesa se tla thusa Basotho ho ea malapeng.

Leha ho le joalo, maliboho oona ha ana ho koaloa, empa, hore motho a fumane VISA ho tla ka hara naha ea Lesotho, o tla lokela ho hlahisa bopaki bo bontšang hore ha a na lefu la Corona. Ho le joalo, batho ba tsoang linaheng tse seng li anngoe ke seoa sena, ba tla khetheloa nako ea matsatsi a 14, ka litjeho tsa bona.

Basotho ba fumanoang ba e-na le matšoao a lefu lena, ’muso o se o hloaile sebaka seo ba tlang ho bolokeloa ho sona. Sebaka se joalo se se se ntse se ena le libethe tse mashome a mararo a metso e mehlano, tse ka sebelisoang hang-hang.

Tonakholo Thabane o boetse o elelitse Basotho ba phelang kantle ho Lesotho, ho se tle hae ka nako ea Paseka, ele ho fokotsa tšoaetso e ka bang teng. ’Muso o tla bua le lefapha la lihlapiso hore na baithuti ba leng linaheng tse anngoeng ba tšehetsoa joang. Mokholoane Ramainoane.

Mekhatlo e re Lekala la Khoebo le Mesebetsi e Meholo le khahlametse basebetsi ka lisebelisuoa tse tla thibela ho ata ha Corona.

Mekhatlo ea basebetsi e mehlano e ileng ea nehelana ka lengolo la litletlebo ho tonakholo bekeng e fetileng, e ile ea memeloa phuthehong ke Lekala la Khoebo le Mesebetsi e meholo ka sepheo sa ho ea shebisana ka toants’o ea seoa sa bohloko ba corona.

Mekhatlo e boleletse se-epa-pitso hore basebetsi ba lokela ho khahlametsoa ka lisebelisuoa tse tla thibela ho ata ha Corona, kaha ka baka la meputso ea bona e mangoleng, ba tla hloleha ho li reka.

Ho feta moo e itse ha se patuoe hore lefu lena le hlaha kantle ho naha ka hoo ho thibeloe batho ba bacha ho kena ka har’a libaka tsa tšebetso ba tsoa kantle ho naha ho fihlela pheko e fumanoe. Mekhatlo eo, ke NACTWU, IDUL, UNITE, LEWA le Lentsoe la Sechaba.