Lesotho le lahleheloa ke M 1.6 billion ka selemo

The Entrepreneurs Network

Lenaneo la Holisa-Moruo la Laboraro la beke ena bosiu, le sebollotse hore Lesotho le lahlehetsoe ke chelete e fetang billione ea Maloti le Halofo, selemong se fetileng sa lichelete, ka lebaka la tlhokahalo ea Barcode. Baeti ba lenaneo ba neng ba tsoa liponts’ong tsa BEDCO, tse ntseng li tsoelapele, Maseru, ba entse mohlala ka tahlehelo eo, ha ba supa bohlokoa ba Barcode.

Sister Julia Mafike, e mong oa ba kenetseng liponts’o tseo ka lihlaisoa tsa linots’i itse o se a le pele haholo ka litsebo tsa tlhahiso o mpa a haelloa ke lipheo tsa ke mo thusang ho hlahisa ka mokhoa oa feme kapa polasi.

Mongahali Ts’episo Mofolo, oa BEDCO o itse liponts’o tsena ke karolo ea moralo o moholo oa setsi sa ha bo, oa ho qhotsisa likhoebo tse nyenyane le ho li holisa, e le tsela ea ho kenya letsoho kholisong le ntlafatsong ea moruo oa Lesotho.

Lenaneo le fihletse hore babusi ba naha ena, ha ba na kutloisiso ea hore na Basotho ba ka thusoa joang ho fihlela bohlahisi ba botseteli.

Lenaneo la Holisa-Moruo le ba bosiu be Laboraro le leng le le leng ka mora litaba tsa hora ea borobong ha e fetile ka metsotso e mashome a mararo, mona ho MOAFRIKA. Le hpoletsoe ho tutubolla Basotho, le ho supisa tsela e ka thusang naha ho hoebisana le tse ling. Mokholoane

Matekane o fumana khau ea bosebeletsi bo hloahloa khoebong, Canada.

MGC founder and Managing Director - Sam-MatekaneMASERU — Monghali Sam Matekane o ikhapetse khau ee a e fuoeng ke boemeli ba ’muso oa Lesotho-Canada, le The Canada-Africa Chamber of Business, ea bosebeletsi bo hloahloa khoebong, ho busetsa sechabeng le katlehiso ea moruo oa naha ena. Ntle le mphohali ena, Matekane o boetse a thonyetsoa boemeling ba Lesotho, Machabeng. 

Khau ena, Mr. Matekane o e amohetse a le naheng ea Canada, ’me o tla fihla ka har’a naha ena kajeno, moo a tla khahlametsoa boemelong ba lifofane ba Moshoeshoe 1 International, ka menyakoe ea thabo. Ho tloha moo, o tla ea khoaollela Basotho matšela-nokana liofising tsa MGC Park Maseru.

Mesebetsi ea hae khoebong le ntlafatsong ea moruo ke e bonahalang, ka likhoebo tse ’maloa tse fumanoeng ke eena. Hape, ke Mosotho oa pele oa ho ba le khoebo ea bofofisi ba lifofane ka hare ho naha ena, ho tloha ka hare ho ea kantle ho eona, ’me ha ho e-s’o be e mong ntle ho eena.

Ka lehlakoreng le leng, Mr. Matekane ke motho ea busetsang sechabeng joalo kaha bafani ba khau ea hae ba bontšitse, kaha selemong sena feela, Matekane Group of Companies, MGC, e fane ka koloi ho mokhatlo o tsamaisang lipapali ka har’a naha, LSRC, ho ntlafatsa tšebetso ea oona.

Ho feta moo, Mr. Matekane o ntlafalitse le ho phahamisetsa sekolo sa Bocheletsane se Mantšonyane, Thaba-Tseka, maemong a Machaba, ka meaho e meholohali le mabala a lipapali, a boleng.

–  Mokholoane