Koloi e utsuoa ka melomo ea lithunya, Mafeteng

Koloi e amohiloeng mong’a eona ka likhoka bosiung ba Sontaha, se fetileng,Thabaneng Ha-Boshoane Sempe, Mafeteng, ke banna ba supileng ba neng ba hlometse ka lithunya, e fumanoe sepoleseng sa Morija kamor’a hore se e fumane Ha ’Majane ho se motho ka har’a eona, e ntse e le maemong  a nepahetseng, feela e phahlollotsoe hohle.

Lijeng Mofokeng, o re morali oa hae o ne a ile a tsoela kantle, empa a hoelehetsa, eena ha a hlaha, a kopana le banna bao ba ileng ba mo khutlisetsa ka tlung ba ’matla chelete, ee a ileng a re ha a na eona.

O re ba ile ba hlekemanya ka tlung le ho mo rosa lesale la monoaneng, ’me e mong a ’mea sethunya molaleng e le ha ba batla senotlolo sa koloi, ba nto ba siea ba ba tlamme maoto le matsoho.

Mokhatlo oa sefapano se sefubelu o tla bokeletsa chelete sebakeng sa bahloki

logo-1.png

Mokhatlo oa sefapano se sefubelu o chechiselitse mokete oa oona oa Gala Dinner, ho la 16 Phupu, 2019, ’me sepheo sa oona ke ho bokeletsa chelete molemong oa batho ba tlokotsing, ba thusoang ke oona.

Mokhatlo o re o tla tšoarela mokete holong ea liboka ea ’Manthabiseng, ’me mosebetsi o tla simolla mantsibuea ka Hora ea botšelela ho fihlela bosiu.

Lithaba tsa maloti li se li soeufalitsoe ke lehloa la pele la selemo

Loti le lipakeng tsa Rapoleboea le Thabaputsoa e ka lehlakoreng la Semonkong ke la pele ho hlaha ka litlaleho tsa lehloa mariheng ana, ho tlaleha Tšeliso Sehloho, mookameli oa MOAFRIKA FM, Semonkong.

O re le hoja le ile la fihla le libakeng tsa Ha Mantša, empa, matla a lena la pele a lipakeng tsa Rapoleboea le Thabaputsoa moo koloi ea mafura e bileng ea emella ka thoko ke ho imeloa ke lona, ka Lapele la beke ena.

Mookameli oa DMA o re litlaleho tsa mathomo, tse fihlileng ho eena, li re lipakeng tsa Mahlasela le Mokhotlong,’moho le lekhalong la Mphosong ho fafalitse le lesesanyane.

Ho sa le joalo litlaleho tse ileng tsa kena Nyakafataneng li re lihlaba tsa Leribe,  tsa Thaba-Mokhele kampong ea Mohalesuku le tsa Lebelonyane, Quthing le tsona li tšoeu bja.

Tlaleho ea sesole ka setho se bolailoeng ke masholu, Thaba-Tseka

Tlaleho e tsoang ofising ea sesole sa Lesotho e re banna ba tšeletseng ba ile ba tšoaroa Masaleng Bobete Thaba-Tseka, ka pelaello ea ho bolaea setho sa sesole, bao ba bararo ba bona ho etsa palo ea robong, ba ileng ba baleha, ka Labobeli lena.

Tlaleho e re sena se latela hore setho seo, se utsoetsoe linku tsa sona ke batho bao se ileng sa ba tseba, sa ba atamela ka khotso, ba se tšepisa ho se lefa liphoofolo tseo ka ’Mantaha ona, ba mpa ba re se tle ka Labobeli.

Setho seo se tlalehoa se ile sa ea sebakeng seo, se se se e-na le e mong oa lelapa, ’me ha ba fihla, babelaelloa ba bitsetsa setho seo thokoana hore ba khokhohanye puo, moo ba ileng ba se khakhatha ho fihlela se timetse ka ha ba ile ba se kopanela le ba bang.

Bakuli ba lla ka setsi sa bophelo sa Ha Ratjomose

Mosali oa Ha-Thetsane Maseru, o re o ile a lokela ho siea litlhare tsa hae ka mor’a ho bona ngaka setsing sa bophelo se Ha-Ratjomose ka Labobeli lena, ka ha ba neng ba lokela ho mo nea tsona, ba itse moo li bolokoang, ha ho na motlakase, ho lefifi.

’Marethabile Mokhele, o re o basebeletsi ba litlhareng ba itse esale ba sa rekeloe motlakase ho tloha ka ’Mesa monongoaha ka mabaka a sa tsejoeng, ba qheqhebisa ka ho ithekela oona, joale le bona ba feletsoe.

O re litlhare o li fumane ka mor’a ho tla Queen II, le teng ka mor’a ho hlahlojoa hape ke ngaka, hobane a ile a bolelloa hore o lokela ho hlahlojoa bocha, ha ho ka moo a ka thusoang, ntle le hore a phete.

Bamameli ba Hora ea Litaba ba ile ba tlatsa ’Marethabile ka hore mathata a setsi seo a maholo hobane bakuli ba lokela ho ipatlela litlhare moo ba ka li fumaneng teng, athe matloana ke tsietsi e fetang.

Liteko tsa Lehakoe la Litaba tsa ho fumana ba ikarabelang setsing seo, ha lia atleha ka ha mohala oa ofisi ea sona o ne ngabaola feela, empa ba ntse ba buletsoe mamati.

Mong’a linyalasi o ema thabeng hore a keke a lefa tšenyo ea tsona Mafeteng

Moahi oa Paballong Ha-Leutloileng Matsepe, Mafeteng, o re mong’a lintja tse neng li lome linku tsa hae tse supileng tsa ba tsa shoa, o hana li lefa ka mabaka a sa tsejoeng.

Monghali ’Mole Sefali, o re taba ena e ile ea buisanoa ke eena le mong’a lintja botenng ba sepolesa sa Mafeteng, a mpa a bolela hore setsoeng ke Ha-Molapo, a keke a li lefa.

O re boemong boo sepolesa sa bula nyeoe, ’me ho tla uoa khotla ha khoeli ea Phupu e tla be e hlola matsatsi a mashome a mabeli a metso e mene, ’me o ntse a eme thabeng hore li lefshoe.

Linku tsa monghali ’Mole tse neng li le ka jareteng ea habo tsona, li ne li hlaseloe ke lintja tse boletsoeng, tsa ba tsa shoa, ’me tse ’ne tsa tsona li ne li emere, morena oa hae a ba a mo etsetsa lengolo le mo fetisetsang mapoleseng.

Basotho ba se ba tla ithekisetsa boea moo ba ratang bakeng sa likhoeli tse tharo

agriculture-animals-baby-288621

Tona-kholo ea Lesotho e re bo Ranku-li-kae ba tla fumana monyetla oa ho ithekisetsa boea bakeng sa likhoeli tse tharo moo ba ratang, ha ho ntse ho etsoa mekutu ea ho lokisetsa thekiso ea bona ka har’a naha.

Dr. Motsoahae Thabane, a bua ’mokeng oa baphatlalatsi ba litaba liofising tsa telebesheneng ea Lesotho ka Laboraro lena, o re o se a bile a laetse hore lihoai tse kolotoang chelete ea boea ba lefshoe hang hang.

Ho feta moo o itse letona la Lichelete le morerong oa ho thehela bacha ba naha ena mesebetsi e likete tse robeli le makholo a mahlano e lebeletsoeng ho qala ka khoeli ea Phupu, monongoaha.

Lelapa la Thakamphana le patlong ea mora lona ea nyametseng

Lelapa la Thakamphana le Matelile Ha-Kanono, Mafeteng, le patlong ea mora oa lona eo ho sa tsejoeng moo a ileng teng, ’me e se e ka ba beke ea bobeli bao a hirileng le bona malaeneng Khubetsoana Ngoana oa Lla, Ha-Hlathe Majara, Berea, ba sa mo bone.

Monghali Tšeliso Thakamphana, ea buileng lebitsong la lona o re o ile a tseba ka ho nyamela ha moena oa hae ka motho ea sebetsang le eena a re eo ha a bonahale mosebetsing, na lelapa le ka tseba moo a teng.

O re mabitso a moena oa hae ke Kabelo Thakamphana, ke motho e mosootho ka lebala, o mahareng ka seemo, o ntse a holisa lenyetse hloohong, kahoo ba ka tsebang moo a teng, ba letsetse 57387109.

Ngoana le ntata’e moholo ba hlajoa ka ntho e bohale ke ea nang le lefu la hlooho

Ngoana le ntata’e-moholo ba Hleoheng Ha-Maqele Leribe, ba ile ba potlakisetsoa sepetlele Motebang ka mor’a ho hlajoa ka ntho e bohale ke mohlankana oa Ha-Polaki ee ho belaeloang a e-na le lefu la hlooho, ka Lapele la beke ena.

Mofuputsi oa litaba tikolohong ea Maputsoe, monghali Sepeka Makoae, o re mohlankana o tlalehoa a ile a ea lapeng la monna-moholo, ’me khopolo ea e-ba hore o il’o ithekela mokankanyane ka ha o rekisoa moo, empa eo a khorohela leqheku le ngoana, a ba nyekenya ka ntho e bohale.

O re ’melaelloa o ile a phetlela mpa moea, empa sechaba sa mo manakisa le ho mo qhautsa, sa nto mo utloisa ka letlalo, a tla namoleloa ke moholoana’e. Leha ho le joalo, ho ntse ho e-so tsebahale na bophelo ba mahlatsipa bo boemong bofe.

Malapa a Maloi le Sefali, a re a ntse a lebeletse ka tšepo hore ba babelaelloa ba polao ea morali oa oona ba tsejoe ba tle ba hlahisoe ka pel’a makhotla a molao, kaha a ne a fumanoe a timetse ha khoeli ena e ne e hlola matsatsi a mabeli, ’me o bolokoa Ha-Kotoanyane, Mafeteng, mafelong a beke ena.

Ea buileng lebitsong la oona Bokang Sefali o re ngoanana o ne a bolaeloe Motse-Mocha Ha-Leutloileng Matsepe hona seterekeng seo ke batho ba ntseng ba e-so tsejoe,’me o ne a fumanoe a le ka har’a lekoaliba la mali e se e le maobane, monyako oa ntlo ee a neng a le ka ho eona, o sa notleloa.