Lekala le fetola linako tsa ho koaloa ha mabenkele, hape

Setsabi
Minister of Trade and Industry, Mr. Halebonoe Setšabi

MASERU — Letona la Likhoebo le re lekhotla la matona le ikelelitse ho eketsa linako tsa ho koaloa ha mabenkele, e le ho arabela seboko sa phohomela, sa sechaba se reng se hloloa ho reka litlhoko tsa sona ka lebaka la nako.

Monghali Halebonoe Setšabi o re mabenkele a ntse a buloa ka hora ea borobeli hoseng, ho fihlela ka ea bobeli motšehare oa mantsiboea, ha makoloi a baeti a tla simolla ho tsamaea ka ea bosupa hoseng, a felle horeng ea bone. O re tokomane e bolelang tsena e tla ba teng ka Labone la beke ena.

Sena se latela hore sechaba se re nako e fanoeng ke ’muso, ea hore se ee mabenkeleng, e nyane, e fela se ntse se le litseleng tse eang ho oona, ’me se khutla se sa reka. ’Mamatebele Mokoenehi

MGC e tla ntlafatsa litsi tsa ho hlahlobela Covid 19, naheng ena

MGC founder and Managing Director - Sam-Matekane

Matekane Group of Companies, e morerong o moholo oa ho ntlafatsa libaka tsa ho etsetsa liteko tsa COVID – 19, Lesotho, e le hore Basotho ba tle ba nolofalloe ke ho tseba hore maemo a bona ke afe tabeng ena.

Mongahali Sam Matekane, o re MGC e tlo ntlafatsa litsi tse seng li ntse li le teng naheng ena, hore li be maemong a hlahlobela lefu leo, ho sa tšeleloe Afrika, moo ho tla emeloa liphetho tse tla khutla ka mor’a nako e itseng.

O re ha libaka tseo li se li tlafalitsoe, ’muso o tla fana ka basebeletsi ba oona, ba tlang ho koetlisetsoa tšebeliso ea thepa ea libaka tseo ke litsebi, e le ho ba nolofaletsa mosebetsi. Mokholoane Ramainoane

Ramats’ella o re Lesotho le ele hloko liphallelo tse tsoang linaheng tse ling.

Bokang Kuoane Ramats'ella

Monghali Bokang Ramatšella, o re naha ena e lokela ho ela hloko ha e amohela liphallelo tse tsoang linaheng tse ling, hore na li tlisoa ka sepheo sefe, haholo nakong ena ea seoa sa Covid 19.

O re ho latela boemo bo renang ba lefu lena, o bona e se bokulo feela, empa ke ntoa e tlang e loanoa ka bohlale ke baruihali ba lefatše, ba reng lichaba li se li tletse holim’a lona, ka baka leo, li hloka ho fokotsoa.

Ho feta moo, hona ke bophethahatsi ba Bibele bo malebana le ho kenngoa ha letšoao la sebata tšebetsong, ho ke keng ha lemohuoa ha bonolo ke batho, ba tlang ho lekanya hore ba mpa ba thusoa bohloking ba bona, athe ke ha ba le kenngoa ka santhao

Thabane o re Thesele le Rantšo ke mampetje ha ba tšepahale

Prime-Minister-Tom-Thabane

Lekhotleng le Phahameng la Lesotho, ka Lapele lena, ho hlahelletse hore ho ne ho se lebaka le neng le ka susumetsa hore Tonakholo e rerise balekane le eona pusong, qeto ea ho koala Paramente, kaha molao oa motheo, o e apesitse ka matla a ho fihlela qeto eo ka kopanelo le Motlotlehi, qhaa!.

Dr. Motsoahae Thabane, o re o bitselitse balekane le eena pusong, ho tla buisana ka litaba tsa bohlokoa tse amang puso, a ba tšepetse ho boloka makunutu a ofisi, empa bobeli boo bo fetohile mampetje, bo lebetse kano ea ho boloka makunutu a liofisi tse boholong, tsamaisong le pusong ea naha.

 Khang ea baikarabelli ke hore le hoja balli ba atametse lekhotla, empa ba sebelisitse temana e fosahetseng ea molao. Ba bile ba lokela ho tseba hore puso e laoloa ke maparamente a lokelang ho sebeletsa sechaba ka kakaretso e seng mekha ea bona.

Advocate Motiea Teele o re lekhotla le lokela ho lekola mabaka a susumelitseng tonakholo ho koala Paramente, ho kenyeletsa seoa sa COVID 19, kaha palo ea maparamente e feta mashome a mahlano.

A re naha e mothating oo sechaba se ikoalletseng ka matlung, le eona Paramente ha se mokhelo. Tsena li hlahelletse ka Lekhotleng la Molao oa Motheo le bopiloeng ka baahloli Sakaoane Sakoane, Moroke Mokhesi le Polo Banyane.

Nyeoe e tla boela e tsoelapele hape ka Labobeli lena, hoseng, ha hora ea borobong e tla be e fetile ka metsotso e mashome a mararo

Motlatsi oa moetellipele oa DC o re litlokotsebe li koatetse selekane sa Potoana le Kobotata

Min-of-Education-Motlalentoa-Letsosa-1

Motlatsi oa moetellipele oa Potoana, o re litho tsa Lekhotla la habo, li se ke tsa ferekanngoa ke litlokotsebe tse ithehileng mabitso a litho tsa komiti e kholo ea DC, li re ha lia khotsofalla selekane sa ABC le DC sa tšebelisano ’moho.

Monghali Motlalentoa Letsosa o re litlokotsebe tseo, li ipuletse mabota a mokunyata ka har’a marang-rang, moo li ntseng li qapa mashano a reretsoeng ho tlisa pherakano feela ho litho tsa makhotla ao a mabeli.

O re temoho ea Lekhotla la habo, ke hore beng ba liketso tseo, ke ba mekha le makhotla a mang a lipolotiki, a utloisitsoeng bohloko ke selekane seo, joale ba hle ba li emise hang hang.

Mabitso a sebelisitsoeng ka har’a marang-rang, ke Letsosa, Ntebo Ranthamane, Dr Likoti le Qoo, ho feta moo, ho kenyelelitsoe Mohlomphehi Mohlophisi e Moholo.

Nyeoe ea ho koaloa ha Paramente e se e tla tsoelapele bekeng e tlang Lekhotleng la molao oa motheo

Dr. Thomas Thabane

Nyeoe ea ho koaloa ha Paramente ho entsoeng ke tonakholo Dr. Motsoahae Thabane, e tla tsoelapele ka ’Mantaha oa beke e tlang lekhotleng la Molao oa Motheo.

Nyeoe ena ke e hlahletsoeng ke mokha oa Kobotata, Maneshenale, litho tsa Bolekana le tsa Potoana, moo li qholotsang qeto ea Tonakholo ea ho koala Paramente.

 Khang ea balli ke hore paramente e koetsoe ba sa rerisoa, ba re ha se Tonakholo Thabane ea elelitseng Motlotlehi ho e koala, empa ke Motlatsi oa hae Dr. Monyane Moleleki, eleng seo ba reng se ka thoko ho molao.

Khang ea lekhotla ke hore molao oa motheo, ha o lumelle taba eo, e bile Tonakholo e hanne mabare-bare ao ka bopaki ba eona bo ka khotla.

Nyeoe ea ho koaloa ha Paramente e tsoelapele lekhotleng la molao oa motheo

MASERU — Nyeoe e hlahletsoeng ke Matoala, Manashenale le litho tse ling tsa paramente tse tsekang hore paramente e koetsoe ka thoko ho molao entse e tsoelapele lekhotleng le Phahameng la naha ena.

High Court of Lesotho

Khang ea manashenale ka muelli oa bona Adv:Lephuthing ke hore paramente e koetsoe asa rerisoa,a re ha se Tonakholo Thabane ea elelitseng Motlotlehi ho e koala empa ke Motlatsi oa hae Dr. Monyane Moleleki,eleng seo areng seka thoko ho molao lekhotla le itse  molao oa mothoeo ha o lumelle taba eo e bile Tonakholo o Hanne mabarebare ao Ka bopaki ba hae boo Ka khotla

Tebello ke hore lekhotla le bopiloeng ka Baahloli Sakoane Sakoane, Moroke Mokhesi le Polo Banyane, le tla mamela lehlakore la Bits’ireletsi kamor’a tinare. Relebohile Lenagu

’Muso o thakhotse ofisi e tlang ho sebetsa litaba tsa Covid 19, Berea.

Chalale Phori
Chalane Phori, MP.

Letona la Likhoebo tse Nyenyane, le re ’muso o thakhotse ofisi e tlang ho sebetsa litaba tsa Covid 19 seterekeng sa Berea, ka Labobeli lena, ’me e tla fana ka litšebeletso tse ipapisitseng le nako ena ea qomatsi.

Monghali Chalane Phori, o re ofisi eo har’a tse ling, e tla etsa bonnete ba hore Lockdown e ntse e sebetsa hantle le ho fana ka thepa e fanoeng ke ’muso le bafani ea ho itšireletsa khahlanong le Coronavirus.

O re ofisi eo, e na le komiti ea tšebetso e bopiloeng ka mafapha a DMA, mekhatlo e ikemetseng le bahoebi har’a a mang, e okametsoe ke ’musi oa setereke sa Berea, ha eena le monghali Semano Sekatle, ba laetsoe ho bona hore e sebetsa hantle. Chalale Mokhethi

Munna o shoa ka ho hlajoa ka thipa, Mafeteng.

IMG_3470_12e7daca-adbc-4991-b98b-2b9df34f3569_900x

MAFETENG — Morena oa Matšaneng Ha-Hlalele, Mafeteng, o re monna o shoeletse tseleng e mo potlakisetsang sepetlele sa seterekeng seo, ka mor’a ho hlajoa ka thipa ke e mong, ba le tlung ea mothamahane bosiung ba Moqebelo o fetileng.

Morena Rethabile Tšepo Hlalele, o re litaba tsena li tlalehiloe ke mosali ee li etsahetseng ha hae, a re banna ba babeli ba ne ba ile ba qabana ba loana eare ha a ba namola e mong a mo hlaba ka thipa, a ba a hlaba eo ea ileng a isoa sepetlele.

O re ’melaelloa o ile a tšoaroa ke sepolesa sa Mafeteng. Mosali o tlalehoa ke eena, a khalemelloa ho rekisa mothamahane bosiu, empa o ithibile litsebe. Tšeliso Thulo

Lingaka tse ncha li llela ho kenya letsoho toantšong ea seoa sa Corona

Medical Tools

MASERU — Lingaka tse sa tsoa qeta lithuto tsa tsona lijunivsething tsa Afrika Boroa, li llela ho kenya letsoho toantšong ea seoa sa Corona. Li bua le Lehakoe la Litaba ka Laboraro lena, li re li sitoa ho kenya letsoho toantšong ea Covid 19, kaha li lokela ho sebetsa tlas’a botataisi ba lingaka tse seng li le tšebetsong.

Li re esale li theha mekhanya ka khopolo ea hore Lekala la Bophelo, le tla li isa botataising boo, empa ha ho nko ho tsoa lemina. Dr. Lucy Mapota, ea ikarabellang tabeng ea lingaka tseo, o re Lekala le phelephanyelitsoe ke seoa sa Corona, le hoja litaba tsa tsona li le mocheng. O boetse a re lingaka tsena, li lokela ho ba litho tsa Medical Council, pele li ka sebetsa. Mokholoane Ramainoane