Monna o memela ba habo ho ea khakhatha mohlankana Ha Tsiki, Maseru.

Ramotse oa Ha-Tsiki, Maseru, o re ho na le monna ea halefisitseng sechaba motseng oo, ka ho memela banna ba bararo bao ho utloahalang e le baamani le eena, ho ea khakhatha mohlankana oa moo, ka Labohlano la beke ena.

Morena Kubelo Tsiki, o re sena se latela hore monna a ee habo mohlankana le banna bao e mong oa bona e leng lepolesa, moo ba fihlileng ba re a ke a itšebe le bona malebana le bosholu bo etsahetseng ha monna eo matsatsing a ho feta.

O re banna ba ile ba tsamaea le mohlankana, ba ea mo khakhathela ha monna eo, ’me lelapa la habo ea tetekuoeng le sechaba, la phalla e le ha le utloa seboko sa hae, la fumana a hlobolisitsoe liphahlo, a ntse a bolaisoa lepolanka.

Morena Tsiki, o re litaba tsena, li tlalehetsoe sepolesa sa Flight 1, se ileng sa re ha se na borumuoa bo laetsoeng ho ea habo mohlankana eo, joalo kaha lepolesa le boletse joalo, ha e le monna ea boleloang, o bile a thota thepa ea ntlo ea hae, a ikela hona ka Labohlano.