Lesotho le ikhakanyelitse setsebi sa Mosotho ka har’a W.H.O

Ngoan’a Mosotho o lla sello sa phohomela, o re naha ea habo e mo lahlile kherehloa, hoja a lutse khubung ea lithuso tsa Mokhatlo oa Machaba oa Bophelo, kahar’a komiti e laolang lilaborathori le lisebelisuoa tsa thibelo ea COVID-19.

 A bua ka Twitter, ngoananyana oa Mosotho, o re linaha tse ngata-ngata tsa Afrika, har’a tsona Kenya, Rwanda, Namibia, Swatsing le Afrika Boroa, li tataisoa ke lefapha la WHO lee a leng ka har’a lona. O re ho fihlela joale, Lesotho le ntse le e-so kokote ho kopa tlatsetso.

 Bamameli ba Pusong ea Sechaba ka sechaba ba ile ba makalla taba ena, ba ba ba lemoha hore hoja setsebi seo sa kopjoa thuso, Lesotho le ka be le se na bothata ba ho hlahloba sechaba sa lona, le thepa e bitsoang PPE e ka be e se bothata.

 Hona lenaneong leo, ho ile ha shebisanoa maikutlo a hlahileng ka motho ea utloahetseng e le ofisiri ea lekala la bophelo, ea itseng se ileng sa phatlalatsoa ho thoe ke tšoaetso e bonahetseng mothong ea tsoang Saudi Arabia, e ne e le ’Mampapali feela.

 Hape, bamameli ba lumellane le maikutlo a motho ee lentsoe la hae le ileng la mamelisoa sechaba, ea itseng ha e le mona Motsamaisi oa Lipuisano tsa Paramente a se a phatlalalitse Dr. Thabane le matona a hae e le babusi ba mehleng, ho lula ha bona pusong e se e le tlolo ea molao.