Lia ja lia roba, maliba ho psha a matala, haeba ke Toala ena.

Prime-Minister-Tom-Thabane

Basotho ba lenaneo la Puo ea Sesotho, ka Labone lena, ba re lia-ja-lia-roba, maliba ho psha a matala, haeba ke Dr. Motsoahae Thabane le Matoala a Malumara, ba lumetseng ho kena lenakeng la Mapotoana le Likatana, ba liha ’muso oa bona ka paramenteng, mathoasong a beke ena.

Tsena, ba li buile kamor’a ho manolla maele a Basotho ba khale, a reng: Lia-ja-lia-roba. Ba re mantsoe ao kea motho ea pelo e bohloko, ea lahlehetsoeng ke thepa kapa maemo a neng a mo behile sehlohlolong sa bophelo.

Ke moo ba ileng ba etsa mehlala e mengata ea taba eo, ha ho tla kenella e reng lia-ja-lia-roba, haeba ke tonakholo e saenetseng ho heletsoa ha ’muso oa eona. Bang ba re haeba ke LCD e seng e matha ka lebatooa le le leng feela ho a lekholo le mashome a mabeli, bang ba re haeba banna le basali ba bang ha ba sa buleloa mamati a makoloi, ha bana ba bona ba se ba ikisa likolong kapa ba palama makoloi a sechaba.