Monna o bolaoa ke batho ba sa tsejoeng, Linakeng Botha-Bothe.

Mok’hanselara oa Linakeng, Damaseka Ha-Kopano, Botha-Bothe, o re monna oa motse oo, o bolauoe ke batho ba sa tsejoeng shoalaneng ea Sontaha se fetileng, ka mor’a hore ba mo koetele ha hae.

 Monghali Lesala Lesala, o re sena se tla ka mor’a hore monna a tebelle banna ba kaholimo ho leshome, lintja, ka khopolo ea hore ke baeti ba hae, empa ba mo qhautsa ba mo ntšetsa kantle ho jarete ea hae.

 O re ba ile ba ea ka monna eo, sechaba ha se phalla sa fumana a se a le sieo ha hae, sa mo fumana ka lengopeng la motse e se e le mofu. Setopo se phuthiloe ke mapolesa a Qalo.