Metsing o re baetellipele ba mekha le makhotla a lipolotiki ba lokela ho tšoarana ka matsoho ho thusa sechaba.

Mothejoa Metsing
Mothejoa Metsing, moetapele oa Nonyana e Kholo, LCD.

Moetellipele oa Nonyana e kholo, o re ena ke nako ea hore baetellipele ba mekha le makhotla a lipolotiki, ba tšoarane ka matsoho ho sireletsa sechaba sa Basotho khahlanong le Coronavirus, ena e tletseng lefatše matsoho.

Monghali Mothejoa Metsing, a bua le Lehakoe la Litaba ka mohala, ka Labohlano lena, o re ena ha se nako ea ho ruthana, empa ke ea ho sebetsa ka matla ho bona hore sechaba sea sireletseha ka litsela tsohle.

Ho feta mona, o ipilelitse ho ’muso oa Lesotho, ho behella ka thoko chelete e ngata, bakeng sa litlhoko tsa sechaba, haholo-holo tabeng ea lijo hobane tlala ke eona e iphileng matla nakong ena.