’Muso o lokolla thekiso ea mothamahane, o bile o tla lefa basebetsi ba lifeme.

Maluti Brewery Beer

Esale thekiso ea mothamahane e koaloa, litla-morao tse bosula tse bakoang ke tšusumetso ea tai, li theohile, ho rialo tlaleho ea Lekala la Bophelo. Leha ho le joalo, ‘muso o nkile qeto ea ho bula likhoebo tseo e-seng tsa mantlha, ka sepheo sa ho tsosolosa moruo o thekeselang, ka lebaka la seoa sa Corona.

 Likhoebo tse rekisang lijo, mothamahane, le tsa bolulo bakeng sa boithapollo, li butsoe hanyenyane, nakong. Tsohle tse rekisoang ke likhoebo tsena, li tla noelloa le ho jelloa malapeng.

 Mothamahane o tla rekisoa matsatsi a mabeli feela bekeng, ’Mantaha le Labone, lipakeng tsa hora ea borobeli hoseng le ea bone mantsiboea, nakong ena ea nyehliso ea melaoana ea khefu-khekhenene.

 Ho sa le joalo, Likhoebo tse neng li koetsoe nakong ea Khefu-khekhenene, li tla buloa lipakeng tsa hora ea borobeli hoseng le ea bone mantsiboea, e le ho boloka moruo oa naha, o ntse o kunya-kunya.

 Khahlametsong ea basebetsi ba lifeme, chelete e joalo e se e le teng bankeng e kholo ea Lesotho, ‘me e tla fetisetsoa lifemeng tse amehileng, e le hore ka Labohlano la beke ena, chelete eo e tle e fihle matsohong a basebetsi.