Basotho ba tsoang Afrika Boroa ba kena ka bongata malibohong a Sani, Maputsoe le Tele.

Sani-Pass Border 🛂

Litlaleho tse fihlileng Lehakoeng la Litaba ka Laboraro lena, li re Basotho ba tsoang Afrika-Boroa ba ntse ba kena ka bongata malibohong a Sani, Maputsoe le Tele, ba tlisoa ka likoloi tsa Afrika-Boroa.

Lelibohong la Tele, ho utloahala litho tsa sesole sa Lesotho, li le malala-a-laotsoe hore li tle li ise batho bao moo ba lokelang ho ea bolokoa teng, ho fihlela matsatsi a leshome le metso e mene, a phethehile.

Ho feta mona, lelibohong la Sani le la Maputsoe, nakong ea ho fihla ha litlaleho tsena, ho ne ho e-so tsebahale hore na litho tsa sesole li teng bakeng sa ho isa batho polokong ea matsatsi a boletsoeng, kapa che.

Ntle ho moo, seterekeng sa Quthing, mofuputsi oa Litaba tikolohong eo, ’Masadam Williams, o itse matlong a kamohelo ea baeti, moo ho neng ho lokiselitsoe Basotho ba tsoang Afrika-Boroa, ho tletse haholo, hoo ba seng ba ntse ba fetisetsoa literekeng tse ling.