Basotho ba 38 ba lebelletse ho tšoaroa ha bahlomphehi ba tsoang Afrika Boroa

Basotho ba mashome a mararo a metso e robeli ba re ba lebelletse ka ts’epo hore DCP Paseka Mokete o tla etsa mosebetsi o tsoileng matsoho, a ts’oare motlatsi oa tonakholo le bao a neng a ile Afrika Boroa le bona, ka ho tlola lipehelo tsa molao oa khefukhekhenene temaneng ea borobeli ka temananyana ea bobeli e koaletsoeng ka masakaneng.

 A bua ho Probono ea Labobeli lena, Monghali Motlalentoa Letsosa o itse, oona molao oo, o bile o re ea o tlotseng a ahloloe tlasa temana ea leshome, boraro bo koaletsoeng ea oona, ’me likahlolo e ka ba M5,000 kapa khoeli chankaneng kapa bobeli ba tsona, ha e ba lekhotla le hloka ho tiisa letsoho, kahlolo eo, e ka menahanngoa habeli.

 Mookameli oa mafokisi a Lesotho, Mr Paseka Mokete, ke moo a ileng a bua hona lenaneong leo, a re o ne a se leseling la taba ena, empa ha e le mona a se a nyenyelelitsoe, o se a qalella ho fuputsa nyeoe khahlanong le mohlomphehi eo.

 Basotho ba 38 ba ileng ba kena lenaneong leo, ba ile ba e ba ntsoe-leng hore molao o lokela ho sebetsa ho bohle ka ho ts’oana, ho sa shejoe maemo a bona.