Bamameli ba eletsa morena oa Ha-Makujoe, Berea, ho batlisisa taba ea lesea le tsekoang.

Bamameli ba Re Nyebekolla Taba ea Labohlano lena, ba elelitse morena oa Ha-Makujoe, Berea ho batla libukana tsa tlhaho ea lesea la moshanyana le tsekoang ke basali ba babeli.

Ba bua sena hobane ba utloile mosali oa Thaba-Tšoeu, Mohalesuku, ea hirileng Lithabaneng Maseru, a lla ka oa Ha-Makujoe, Berea, ea reng lesea leo ke la hae, lee a ileng a le siea matsohong a hae.

Ho feta mona, ba re ho uoe lipetleleng tsa St. Joseph’s Roma, Makoanyane le Queen ’Momohato Memorial, moo ho boleloang ngoana a hlahetse teng, bobeling boo ba basali.

Sena se latela hore ee lesea le leng matsohong a hae, ’Matalimo Moleko, oa Lethuela, ea itseng ke ’malona, a bolelle Lehakoe la Litaba hore ho na le mosali ea ikemiselitseng ho mo amoha lona, ee a kileng a lula le eena, khoeling ea bobeli ea selemo sena.

 Ho feta mona, o re mosali o ne a fihle ha hae e se moimana, a tlile a re o thoasitse sefaha, empa a tsamaea ka lebaka la ho mo etselletsa ka hore o itse o na le likamano tsa bochaufa le monna oa hae, feela ho se joalo.

 Mosali ee ho lluoang ka eena, ha a qetella a fumanoe nakong ea boqolotsi ba litaba tsena, tsa ba tsa fetela moeeng, a sa arabe mohala, ha Morena Malia Mahotloane Makujoe, a itse o batla lesea leo, ’me o sea bile a tlalehetse sepolesa hore se mo thuse.