Moahi oa Ha-Shelile, o batla ho khutlisetsoa chelete ee a rekileng setša ka eona.

Moahi oa Ha-Shelile, Maseru, o re monna oa motse oo, o hana ho mo khutlisetsa likete tse leshome le metso e supileng tsa Maloti, tsee a rekileng setša ho eena ka tsona, kaha a boetse a se rekiselitse motho e mong.

Monghali Moeketsi Mphasa, o re o ile a lefella setša seo chelete e boletsoeng, a ba a hloma lipalo, empa ka mor’a nako ha a boela teng, a fumana ho se ho teratetsoe ka terata lipalong tsa hae.

O re o ile a fumana hore setša seo, se rekiselitsoe motho e mong, ke ha a tla batla chelete ea hae, joale eo, a se a mo tlolisa khati, a mo isa moreneng, moo eo a boleletsoeng hore a khutlise chelete, ’me molekane oa hae a itlama ho e lefa.

Morena Tšeliso Tšekelo, o re litaba tsena li fihlile ofising ea habo, a ba a bolella molli ho ea li tlaleha sepoleseng se tlang ho mo tataisa hore na a latele methati efe e tla mo rarollela qaka eo.

Ee ho lluoang ka eena, monghali Akhente Mothobi, a bua Nyakafataneng ea Laboraro lena, o itse ntle ho phoso, o tla khutlisetsa monghali Mphasa chelete ea hae hang kamora khefu-khenene ea Covid19, ebe kamora moo, o khutlisa le ea motho oa bobeli ee a mo rekiselitseng sona.

O re o ile a rekisetsa monghali Mphasa setša hobane a ne a batla ho koala lebaka, le sa kang la fela ha a tla boela a se rekisetsa motho e mong hore a le qetele. ’Mamatebele Mokoenehi