Banka e Kholo e theola CBL rate, hape.

MASERU — Komiti ea Banka e kholo ea Lesotho, e alositseng botsitso ba maemo a litheko (MPC), e nkile qeto ho theola sekhahla sa tsoala sa kalimo sa Banka e’o (CBL rate), ka Labobeli la beke ena, ka sepheo sa ho tsosolosa moruo o amiloeng ke seoa sa Corona.

IMG_20200415_160735_467

Sekhahla sa tsoala sa kalimo sa Banka e kholo se theohile ho tloha ho 5.25 ho ea ho 4.25 lekholong, boleleng ba selomo.

Theolelo ena e etsahetse ka mora hore komiti e lule lekhetlo la bobeli, ka ts’ohanyetso, nakong ena ea seoa sa Corona.

Ho theoha ha sekhahala sa tsoala seo li banka se kalimang ka sona, Bankeng e kholo ho tla theola sekhahla seo bahoebi le baji ba alimang ka sona libankeng, le ho nyolla sekhahla sa ts’ebeliso ea chelete ka hara Moruo – ka ha litheko tsa lijo le lithlaisoa tse fapakaneng li lebeletsoe ho theoha ke qeto ena.

Sesiu sa Lesotho sa lichelete tsa machaba, sona ha sea fetoha, ka mora hore se nyolohele ho makholo a ts’eletseng a metso a ts’eletseng a li dollara tsa America ($660 million), kopanong ea ts’ohanyetso e bileng teng khoeli e fetileng.

Holima qeto tsena tse peli tse kholo, Dr. Rets’elisitsoe Matlanyane ka boemo ba hae e le mookameli oa Banka o manolotse liqeto tse nkiloeng ke ‘muso litabeng tsa moruo. Li Banka le li Insurance, li tla lumella Basotho ho se lefe mekoloto ea bona nakong ea li khoeli tse tharo, empa hang hore nako e joalo e fete, Basotho ba tla lokela ho ea ikopanya le litsi tse amehang ho sheba tsela e ncha ea ho lefa.

O tsoetsepele ho hlalosa hore nako ea likhoeli tse tharo, ke nako eo likhoebo li ka e kokomosang li sa fumane letho, pele li ka iphumana li hula ka falese ea morao, eseng hore lefu lena le aparatseng lefats’e le tlo nka likhoeli tse boletsoeng. Tlaleho ka Mokholoane Ramainoane