Bahoebi ba mothamahane le mekoari, ba re polelo ea tona-kholo e ba siile kantle

Bahoebi ba mothamahane, Botha-Bothe, ba re ba thokotsoe ke polelo ea tonakholo e ba siileng kantle ha ho sitsoa mekhahlelo e meng ea sechaba, e tlang ho fumana molemo cheleteng e tlang ho fanoa ke ’muso ho arabela litlhoko tsa letsatsi ka leng, nakong ena ea Covid 19.

Molula-setulo oa Komiti ea mothamahane ka bochabela monghali Teboho Khabane, o re ba kentse letsoho le toma ho thusa ’muso ho fa Basotho mosebetsi, empa boemong bona o ba lahlile kherehloa.

O re ba tsietsing ea ho lefella meaho ee ba e hirileng hobane ha ba sebetsa letho khoeling ena, ka mabaka ana, ba kopa ’muso ho ba lumella ho bula ka linako tse itseng e le hore ba tle ba ’ne ba tsebe ho phela le basebeletsi ba bona.

Ho sa le joalo, mekoari le eona e re polelo ea tonakholo e e lahlile joalo ka ’moko oa pere, empa se makatsang ke hore sepetlele sa Queen II, se ntse se heletsoa nakong ena ea Covid 19, feela eona e ntse e senyeheloa ke lisamente, ’me marako a se a bile a ntse a nyehla ke lipula, hobane a e-so ruleloe.

Puisanong le Lehakoe la Litaba, monghali Joang Molapo o itse ha ho ka moo ’muso o ka lahlang bahoebi ba naha ena ka teng, hobane tonakholo e buile le ka bona letloleng le tlang ho thusa ba bang.