Lesotho le behelletse M 698 million ka thoko ho loants’a COVID-19

Thabane, PM
Lesotho Prime Minister Dr Motsoahae Thomas Thabane

Polelong ea eona ea ’Mantaha oa beke ena, Tonakholo ea Lesotho e itse ’muso oa lona, o beheletse ka thoko limilione tse makholo a tšeletseng mashome a robong a metso e robeli tsa Maloti, ntlafatsong ea litšebeletso le ho batla lisebelisuoa tsa bophelo e le ho loantša Covid 19.

Dr. Motsoahae Thabane, o re nakong ena eo ho ipolokiloeng khahlanong le Corona, bahoebi ba banyenyane le ba baholo, ba tobane le phephetso e kholo ea ho lahleheloa likhoebong tsa bona, kaha ba sa rekisi letho ka lebaka la boemo bona.

O re ka mokhoa o tšoanang, basebetsi le bona ba tobane le ho felloa ke mesebetsi, ’me le bahirisi ba matlo, bahoebi ba lihotele le ba bang ba bangata, ba ka har’a tsuo e tšoanang, ka mabaka ana, ’muso o tlilo theha letlole le reretsoeng ho thusa bahoebi ba ikemetseng.

Litabeng tsena, mekhahlelo e boletsoeng ea sechaba, e re ha e utloisisi tsela eo ’muso o tlang ho sebetsa ka eona, e shebile lirente tsa meaho e hiriloeng bakeng sa khoebo, ho lefa basebetsi le oona makhetho, ’me ba bile ba re beng ba meaho ba se ba ntse ba ba tšepisa ho ba leleka ho eona ha ba keke ba e lefa.

Litabeng tsena, Lesotho Chamber Of Commerce ka mongoli-kakaretso oa eona, monghali Fako Hakane, o re e khothalelitse bahoebi ho tšehetsa ’muso boitokisetsong ba ho loantša Covid 19.

O re boemo bona bo amme moruo, empa ha ha joale, ho sa shebanoe le ho boloka bophelo ba sechaba ka litselana tse fapakaneng, tsee bahoebi ba bang ba seng ba ntse ba kenya letsoho le toma. ’Mathabo Chobokoane