Sephetho sa tlhahlobo ea babelloa ba Corona se re Lesotho ha le e-s’o be le eona

Thesele 'Maseribane

Sephetho sa tlhahlobo ea Basotho ba supileng, ba neng ba belaelloa tšoaetsong ea Covid-19, se khutla Afrika Boroa, se re ha ba na eona.

Lekala la bophelo, phatlalatsong ea lona ea Laboraro lena, e re ba sa boetse ba romeletse lisampole tse ling tse tharo lilaborathoring tsa Afrika Boroa, ’me ba lebelletse sephetho sa tsona haufinyane.

Ho fihlela joale, Lesotho le ntse le e-s’o be le mokhoa oa ho iketsetsa litlhahlobo tsa lona, le thusoa ke Afrika Boroa. Hape, ke e ’ngoe ea linaha tse fokolang lefatšeng lohle, tse e-s’o be le tšoaetso ea lefu lena la seoa. Linaha tse ling ke Sao Tome, South Sudan, Malawi le Comorros. Mokholoane Ramainoane