Morena o re mobusuoa ke le-hana-puso

Ramotse oa Ha-Shelile, Maseru, o re mosali ea reng o mo rohakile ka mahlapa a tala, o’a mo etselletsa, ho teng, eo, ke le-hana-puso le bileng le tloaetseng ho mo neta ka mashano.

Morena Rampepuoa Mohono, o re mosali ke motho ea sa buseheng hobane ha a laeloa ho ntša mohiri ea belalelloang ka botlokotsebe malaeneng oa hae oa ikhanela.

O re mohiri ea boleloang, o belaelloa ho hlahela basali ba motse oo ka lifenstere le ho lelekisa mosali oa hae ka thipa, ’me tšabo ke hore o tla baka tšollo ea mali, ka baka leo, a hle a tsamae.

Sena se latela hore ’Mamacha Machaha a lle ka hore morana oa hae o mo rohakile, a ba fasoa ke mahokela ka taelo ea morena le ho mo isa mapoleseng a HaThetsane, ka le reng ha a busehe. ’Mathabo Chobokoane