Libini tsa naha ena li re ’muso ha oa li kenyeletsa moralong oa oona nakong ena ea Covid 19

Libini tsa naha ena li re ho bonahala ’muso oa Lesotho o sa re letho ka tsona, ntlheng ea hore li ’ne li rekise ’mino oo li neng li iphelisa ka oona pele ho khefu-khekhenene ea Covid 19.

Ea buileng lebitsong la tsona, monghali Lempe Leteketa, ea tsejoang ka Boima, o re ’muso ha oa kenyeletsa libini moralong oa oona oa hore li fumane letho ho tsoa ka mokotleng oa oona.

Phala ea Lesotho Music Rights Association, monghali Thulo Monyake, o re mokhatlo o ntse o sebetsa litaba tsa libini ka ho bokelletsa manane a tsona kaofela, tse ka hare le kantle ho oona, hore o ee ho bafani ho li kopela lithuso, nakong ena ea Covid 19.

Bosieo ba a mang a maparamente, bo hlolisa ho arajoa ha lipotso ka Ntlong ea sechaba.

Parliament of Lesotho

Mokhethoa oa Malingoaneng, Monghali Serialong Qoo, o re lipotso tse neng li lokela ho arajoa ka paramenteng, ka Labone la beke ena, li hlotsoe ho tsoelapele ka lebaka la bosieo ba a mang a matona.

O re o fumane ka mehloli e tšepahalang hore a mang a matona a ile Afrika-Boroa, ho president Cyril Ramaphosa, ho ea kopela Dr. Motsoahae Thabane ho lula setulong sa puso ho fihlela ka selemo sa 2022.

O re ho feta moo, kaha matona ao a ile moo Covid19 e hlasitseng haholo, ho khutleng ha oona, a tla lokela ho fetela sepetleleng sa Berea, bakeng sa matsatsi a leshome le metso e mene, moo a tla ba mang e le ho bona hore ha a na matšoao a Coronavirus.

Baits’okoli ba ts’oareloa ho rekisa lipompong, Maseru.

ET2P6tsWsAEnsKx

Banna ba babeli ba baitšokoli, ba litlamong tsa sepolesa sa Maseru e bohareng, kamora ho fumanoa ba le molato oa ho rekisa poone, lipompong, likoankoara le masimba, ka Labone lena, ’me Sepolesa se re ba tla hlaha khotla ka letsatsi la pele la beke e tlang.

Molula-setulo oa Khathang-Tema baitšokoli, monghali Tšolo Lebitsa, o boletse hore ba tla sala taba eo morao, ho utloisisa hore na ’muso o fela o tiea hore Basotho ba ka tšoareloa ho rekisa lipompong, empa melata e ntse e li rekisa ka mabenkeleng.

SR e etsa rata oa heno ho Basotho ba Afrika Boroa, ba llang ka tlala.

mojapelo
Moetellipele oa Kanana ea Basotho, Teboho Mojapela.

Lekhotla la Kanana ea Basotho, SR, le fane ka likete tse leshome le metso e mehlano tsa Maloti ho mokhatlo oa Lehae la Basotho, ho rekela Basotho ba Gauteng, Afrika-Boroa, li-ea-ka-maleng nakong ena ea Covid 19.

Phala ea lona, monghali Thabo Shao, o re sena lekhotla la habo, le se entse e le ho arabela tlhoko e ka sehlohlolong ea Basotho ba llang ka tlala ka linako tsohle, hobane ba re Afrika-Boroa, e ba sekisetsa ntlheng ea lijo, ’me le ntse le tlo tsoelapele ka morero oa ho fana.

Mookameli oa selakha sa Dion o leboha MoAfrika FM.

Mookameli oa Dion Butchery, o re o leboha Moafrika FM, ka ho mo fumanela moreki ea ileng a siea nama ea kolobe hore a e khekhetheloe, khoeling ea bobeli ea selemo sena, ea e latileng ka Laboraro la beke ena.

Monghali Mojela Posholi, o re ho ne ho se ho le halele ba letsetsa moreki eo oa bona, ea neng a atisa ho ba tšepisa hore o tla ea e lata, ho fihlela taba eo, ba e akhela Lehakoeng la litaba hore le kene lipakeng.

Tsena li qoqiloe ho Hora ea Litaba, ea Laboraro lena, moo e mong oa bahoebi ba naha ena, Mrs ’Mamakamane Makamane, a elelitseng monghali Posholi ho batla ramolao, ea tlang ho mo thusa ho etsa melaoana le lipehelo tse tla tlama moreki ho se siee thepa ea hae nako e ratoang ke eena.

Sena, ’Mamakamane o se buile hobane a utloile mookameli oa selakha a re o se a kile a isoa khotla ka lebaka la moreki ea ileng a siea nama moo, hore a e khekhetheloe, a ea e lata ka mor’a matsatsi, e se e senyehile, a qosa mong’a selakha, eena a lokela ho lefa moreki eo likete tse hlano tsa Maloti.

Rakuoane o phubula ’Maseribane molomo ka paramenteng

IMG_20200429_194905_903

Moetellipele oa Khoeetsa ea Sechaba, monghali Lekhetho Rakuoane, o phubutse molulasetulo oa komitjana ea matona molomo, nakong ea ha a ne a tlalehela Lekhotla la Sechaba hore na tšebetso ea Command Centre e bile joang ho tloha sethathong ho tla kena joale.

Sena, Mr Rakuoane o se entse nakong ea ha morena Thesele ’Maseribane a ne a ntse a araba potso ea moetellipele oa bohanyetsi, monghali Mathibeli Mokhothu, ke moo e mosehla oa Qhoali a ileng a itlama ho ngola tšisinyo e tlang ho lumella taba eo, ho fetofetoloa, nako e teletsana ke bakhethoa ba sechaba.

Molao oa qomatsi ea covid-19 o feletsoe ke matla ka Labobeli la beke ena

FB_IMG_1588187072652

Molao oa qomatsi ea covid-19 o felile ka Labobeli la beke ena ka khitla ho ea ka molao o e thehileng, e leng kasete ea nomoro ea 33 e neng e lekanyelitse qomatsi eo ho sebetsa kahar’a matsatsi a 14, lipakeng tsa la 15 le la 28 ’Mesa ea monongoaha.

Le ha ho le joalo, Adv Letuka Molati oa Maseru o re bothatanyana bo teng ke hore molao o khinang bolokolohi ba sechaba, o okha matla a oona ho oa bophelo oa selemo sa 1970 le oa qomatsi ena e feletsoeng ke nako.

Ka lebaka leo, Adv. Molati o re ho hlakile hore ho na le likarolo tsa lithibelo tsena, tse seng li sena matla holim’a sechaba le tse ntseng li e-na le oona.

O bile a re ha e ne e ka ba ho ea ka eena, ’muso o ka be o sa ka oa phatlalatsa qomatsi, empa, oa sebetsa o ipapisitse le molao oa likoluoa oa naha ena.

Lintja li bolaea ngoan’abo tsona, Ha-Seshote, Leribe

IMG_20200429_064605_924

Moahi oa Matsoku Ha-Seshote Leribe, o re mor’a hae, o bolailoe ke lintja tsa habo, tse ileng tsa kopana le eena a le tseleng a neng a ilo lata lipere tse neng li balehile motebong, mesong ea ’Mantaha oa beke ena.

 Monghali Motjoka Lekhooa, o re lintja ha li kopana le mora tseleng, li ile tsa mo khama le ho mo loma ho fihlela a timela, ’me balisana ba babeli ba ka mehla ba motebo oa hae, ba bile ba li fasa le ho phutha setopo.

IMG_20200429_063359_064

O re mora oa hae ke oa bosupa ea lonngoeng ke lintja tseo, le hoja eena li ’molaile.

Command Centre le Lekala la Bophelo li phalleloa ke Vodacom Lesotho

m1gyetrypkkr6phcfx16

Mookameli oa Lefapha la Molao le Likamano tsa Sechaba, k’hamphaning ea mehala le marang-rang ea Vodacom Lesotho, o re e le ho kenya letsoho toantšong ea Covid 19, e fane ka lifono tse sekete ho Command Centre.

 Monghali Molemo Motseki o re Lekala la Bophelo lona, le fuoe nomoro ea Call Centre, moo sechaba se tla tseba ho letsetsa teng mahala, ho fumana tlhahiso-leseling ka litaba tsa Covid 19, ’me eona ke 80032020.

O re ntle ho moo, bahlanka ba Lekala la Bophelo, ba filoe lifono tse sekete tse tlang ho tšeloa moea le Data ke VodacomLesotho, bakeng sa likhoeli tse tharo, e le ho ba nolofaletsa mosebetsi, toantšong ea lefu lena.

 O re ho feta mona, ka morero o tšoanang, Vodacom Lesotho e fokolitse litjeo mafapheng a fakapaneng a eona, moo bareki ba romelang lichelete tsa bona ka marang-rang.

Basotho ba re maCommand Centre a itšoanela le motho ea ileng letsemeng

Serialong-Qoo-DC-Spokesperson
Serialong Qoo, MP.

Mokhethoa oa Malingoaneng, monghali Serialong Qoo, o re setsi sa taolo le thibelo ea seoa sa Covid19, se bitsoang Command Centre, ha sea thehoa ka molao, ka lebaka leo, mosebetsi ohle o etsoang mono, le ba sebetsang teng, ha ba a sireletseha ka molao.

Ka lebaka leo, o itse, paramente e se e shobile malikhoe, e menne lihempe, e sebetsana le ho bopa molao o tlang ho e sireletsa le bohle ba sebetsang tlas’a Command Centre.

Tšireletso eo, e lokela ho hapella likotsi tse ka hlahelang setho sa Command Centre se le mosebetsing oa eona, kapa sa qosoa ka lipolelo tsa sona tse amanang le eona. Boemong ba joale, o itse bohle ba itšoanela le motho ea ileng letsemeng kapa mohlabaneng kapa nyatsing.

Mohlomphehi Mohlophisi e Moholo, ka boemo ba hae e le setho sa Communication Cluster ea Command Centre, o kopile Mokhethoa oa Malingoaneng ho ea kopa ho banna le basali ba habo ho etsa hore molao oo o qale morao, e le ho sireletsa ba seng ba ntse ba le tšebetsong, ho tloha Command Centre e simolotse le ba e kenelletseng tseleng.

Ho feta moo, o itse molao o tlang ho etsoa, o tla be o sireletse lichelete tsa sechaba tse sebelisoang ke Command Centre. Mohlomphehi Mohlophisi e Moholo.