Monna o khakhatheloa linku tse keneng ha mok’hanselara, Bafali, Mokhotlong

Monna oa Bafali Ha-Poso, Mokhotlong, o re o hobositsoe le ho khakhathoa ke banna ba tšeletseng ba motse oa habo, ka le reng o lokollotse linku tsa hae moreneng moo li neng li tšoeroe teng ka Sontaha se fetileng.

Monghali Lehlohonolo Lebitsa o re o ne a fihla a tsoa sebakeng se seng, eaba o hlokomela hore linku tsa hae, li kene ka jareteng ea mok’hanselara, a ea li ntša teng, empa banna ba boletsoeng, ba li thibella, ba nto mo khakhatha, ka mor’a ho mo fasa ka lihanaboi.

O re ba ile ba qhobela linku tseo moreneng, ha eena a ile a ea tlalehela sepolesa sa Mokhotlong se ileng sa mo bulela nyeoe le ho mo neha foromo ea ngakeng.

Mok’hanselara oa tikoloho eo, monghali Mosiuoa Phakisi, o re taba ea ho khakhathoa ha molli ka baka la liphoofolo o e utloile e ntse e buuoa, ho teng, o tseba hore molisana oa molli le moena oa hae, ba ne ba le moreneng hobane ba ne ba ilo botsoa ka ho faoloa ha liramo tsa moahi oa motse oo. Mohlalefi Kokoropo