Lehlohonolo Motlamelle o isoa sepetlele Mohlomi ke baahi ba Ha Leqele, bakeng sa polokeho

Baahi ba Ha-Khechane Ha-Leqele, Maseru, ba fetiselitse Lehlohonolo Motlamelle sepetleng sa Mohlomi ka Laboraro la beke ena, ka mor’a ho fumanoa ka har’a motse oo, a ntse a itsamaela feela. 

Ea buileng lebitsong la bona monghali Moeketsi Thelingoane o re sena ba se entse hobane har’a tse ling ba batla ho mo pholosa ho batho ba ka mo hlahisang kotsi, ho latela hore, o ikenela feela matlong a beng ba oona.

O re ho feta moo, ho bonahala a e-na le bokooa ba puo, empa see a mpang a ba bebofaletsa ho buisana le eena ke hoba, o tseba ho ngola lebitso la hae le la ntat’ae, le hoja a thatafalloa ke ho bolela sebaka sa habo.

Taba ena ke mokhosi o fihlileng Lehakoeng la Litaba o re mohlankana esale a e-ba motseng oo ka Moqebelo o fetileng.

Lehlohonolo Motlamelle, o tlalehoa a le motšo ka lebala, o mongoapo lerameng le leng, ’me o apere tjena: lamba e ntšo, borikhoe bo bothokoa ba sekolo, lieta tse ntšo tsa grasshopper.