Letsosa o re ntoa ea likhakanyo tsa lichelete ke hona e tlang

Min-of-Education-Motlalentoa-Letsosa-1

Monghali Motlalentoa Letsosa o re polelo e neng e etsoa ke letona la lichelete ka Laboraro lena, e ne e mpa e le selelekela feela sa hore na le nahana joang ka pokeletso le ts’ebeliso ea lichelete tsa sechaba, ho tloha monongoaha ho isa isao ka nako eona ena. 

Ka lebaka leo, o itse sechaba sa Basotho se se ts’ohe ha e le mona bohanyetsi bo hlotsoe ho kholisa motsamaisi oa lipuisano le maparamente a mang khahlanong le polelo ea Laboraro lena,ntoa boholo kea hosane, ha lona letona leo, le tla be le teka Setsoants’o sa molao oa pokeletso le ts’ebeliso ea lichelete, se tla beng se kollang polelong eona ena. 

Ho le joalo, o hlotsoe ho hlaka holim’a hore na bohanyetsi bo ka thibela ho feta ha sets’oants’o seno joang, bo lofa paramente. Nkhono ’Mathabo Chobokoane o botsitse joalo a ipapisa le hore litulo tsa bohanyetsi li ne li le le masoba-soba nakong eo ea khang e kholo holim’a Ntlha ea Tsamaiso.