Monna o utsoetsoa M2000.00 ka lebenkeleng le rekisang mothamahane, Borokhoaneng, Maseru

Monna oa Phopholetsa Ha-Mabote Berea, o re o ne a utsoetsoe likete tse peli tsa Maloti ke monna ea bitsoang Masupha Marake, ea ileng a re o sebetsa khoebong ea mothamahane e Borokhoaneng Maseru, ka Tšitoe ea ngoahola. 

Monghali Lefa Motinyane, o re o ne a ile khoebong eo, a il’o reka joala ba khoebo ea hae e motseng, moo a ileng a atemeloa ke monna eo ka le reng a lefelle lik’heisi tsa hae, hoba ba se ba ntse ba laesha vene, ba hloka ho nkella le ba hae. 

O re eo o ile a re kaha ba potlaketse ho laesha, a mo nehe chelete a hle a lefe ho ba mechening, empa ka ho panya ha ntši a be a se a nyametse ka chelete eo, ho fihlela kajeno. Taba ena o e tlalehetse sepolesa sa Ha-Thamae, hona letsatsing leo.

Ena ke tlaleho ea boraro e fihlileng Lehakoeng la Litaba e bua ka monna oa lebitso leo, ee e reng ha le mo botsa ka batho ba llang ka eena a khethe ho se fane ka lehlakore la hae litabeng tseo, hoba o letsetsa batho ka nomoro ee e reng ha e fuputsoa ho hlaha lebitso le boletsoeng.