Nyeoe ea tonakholo Thabane e fetela Lekhotleng la Molao oa Motheo

ERhxaUPVUAEsCc5

’Maseterata oa Maseru o fetiselitse tonakholo Motsoahae Thabane lekhotleng la motheo la naha ena pele a balloa qoso ea polao ea mosali oa hae, Lipolelo. Sena se etsahetse ka Lapele la beke ena, pele Mohlomphehi a ka kenngoa ka lebokoseng la boqosuoa, ho ea balloa qoso eo.

’Muelli oa hae, Mr Qhalehang Letsika oa Maseru, o ile a etsa khang e ileng ea qetella ka hore ’maseterata a amohele kopo, ea hore ho qaloe lekhotleng la Molao oa Motheo, le toloke hore na h’oa nepahala hore tonakholo e litulong, e huleloe makhotleng a boahloli ho ea araba nyeoe ea tlolo ea molao.

’Maseterata e ne e le monghali Phethisi Motanyane ha mofapahlooho o ne o emetsoe ke Adv. Mpati Motšoane oa ofisi ea Mochochisi e Moholo oa naha ena. Ha ho’a boleloa hore na nyeoe e tla ea ba ka lekhotleng leo la molao oa motheo neng.

Ho bile teng Matona le batlatsi ba oona, ba neng ba ka feta leshome ka palo, sechaba sona e le boieane, se akha batšehetsi ba tonakholo ba neng ba thabetse qeto ea lekhotla. Ba ile ba tlaka mapolesa ka hore: “tšiba ho lla tse ka mahafing a oona.”

Mohlomphehi ea neng a apere sutu e boputsoa ba leholimo,o ne a lotiloe ke “mosali oa menaesa” Dr ’Maesaea Thabane, ea neng a apere mose o mokhoabana oa sefuba,o khabisitsoeng ka lipalesa tse tšoeu ho tloha holimo ho ea tlase, a roetse lek’heu le letšoana le lebanta le lephatšoana, haufi le bona ho lutse letona Samonyane Ntsekele ea neng a apare bokhubelu ba mali,sefubeng.

Letona Temeki Tšolo ha le feta pel’a sechaba se neng se khobokane kantle ho lekhotla ka bongata, le ile la re “u keke ua liela katse selomong.”

Athe Mohlomphehi Mohlophisi e Moholo eena o hlola a bolelletse bamameli ba se-ea-le-moea sena sa Molimo, sa sechaba ka sechaba hore nyeoe ha se potele, ho n’o emeloa liqeto tsa makhotla.