Metsing le Mochoboroane ba kopa namo ea lekhotla la Molao oa Motheo

Selibe Mochoboroane
Moetapele oa Sethala sa Moruo – MEC

Benghali Mothejoa Metsing le Selibe Mochoboroane ba hlahletse nyeoe e potlakileng ka Lekhotleng la Molao oa Motheo la Lesotho, thapameng ea La-pele la beke ena, ba kopa hore le hlahlobe le be le tjebele hole lisamane tse ba bitsetsang lekhotleng la ’maseterata ho ea balloa liqoso tse tlang ho ba hapella nyeoeng e tjametseng Lt Gen Tlali Kamoli, ea ho liha ’muso oa lesotho.

Nyeoeng e tlang ho kena ka Labobeli hoseng, benghali bana ba re nyeoe ena ke matsollopeli-mapata-masene, ke ea lipolotiki e seng ea tlolo ea molao,’me e thulana ka kotloloho le Memorandum o neng o saeneloe ke Sadc, Bohanyetsi ba Lesotho le ’Muso oa naha ena e reng ho se be motho ea ka qosoang ka litaba tsa mofuta ono nakong ena ea tlhopho-bocha.

Ho feta moo, ba re na ho tla joang hore e be ke hona ba hapelloang nyeoeng ea selemo sa 2018, selemong sena empa e sa le ba le teng kahar’a naha.

Ba re ke maikutlo a bona a sa thekeseleng hore ’muso o leka ka mekhoa eohle ho ba suthulemeletsa kantle ho lebala la lipolotiki nakong ena ea likhetho tse nkhang ka lebaka la ho ts’oerehla ha ’muso oa Lephele.

Ka bobeli, baetellipele bana ba Nonyana e Kholo le Sethala sa Moruo ka tatellano ea ho bitsoa ha mabitso a bona, ba buelloa ke Adv Motia Teele KC oa Hlotse, Leribe, a thusoa ke Adv Napo Mafaesa oa motse-moholo Maseru.