Moahi oa Mapholaneng Ha-Retšelisitsoe Sekonyela, Mokhotlong, o re monna ea itseng ha a tsebe letho ka linku tsa bosholu, o leshano o bile le ’momori oa ho li utsoa le ba bang ba babeli, ba ileng ba lumela hore ba tla li lefa.

 

Monghali Hopolang Nkalai, o buile sena hobane monghali Likhapha Maimane ea belaelloang bosholung ba linku, a re o ile a tlameletsoa molatong oo a sa o tsebeng, empa ha ho se ho fatisisoa ke bafuputsi ba Lehakoe la Litaba, ha fumanoa tse makalitseng bamameli.

Monghali Nkalai o ne a ile a bua litaba tse tšoanang le tsa morena Retšelisitsoe Sekonyela tse itseng Maimane o itlamme ho lefa liphoofolo ka la mashome a mabeli a metso e mehlano khoeling e fetileng, eena le ee ba belaelloang bosholung boo, empa ha ba e-so phethahatse.

Sena se latela hore ba bang ba bamameli ba Re Nyebekolla Taba ea Labohlano lena, ba re monna oa Mapholaneng Sebera Ha-’Malebohang Lethakha Mokhotlong, ea reng o ka mor’a sehlahla hobane ho na le lepolesa le mo joetsitseng hore a hle a inoese chefo, a bue nnete le ho lefa liphoofolo tsa motho tsee a li utsoitseng.

Lehlakore la sepolesa ha le eo tabeng ena kaha mohala oa ofisi o ne o lla feela, le ha ho le joalo, le tla amoeleha.