Moqoqo o hlokahala pele kapa qetellong ea mosebetsi

Bamameli ba Puo ea Sesotho ho MOAFRIKA FM ba re moqoqo ke ntho ea nakong ea ha batho ba se ba qetile mosebetsi, ba phomotse, kapa pele mosebetsi o qaleha. Ba re ke puisano e sa hlophisoang e ka etsetsoang hohle.

Ba bua lenaneong la bona la Labone lena, ba itse moqoqo o ka tsoalla baqoqi molemo, kapa oa senya likamano, kapa oa hlahisa kotsi haeba ho etsetsoa mosebetsing, moo o ka ’nang oa baka liphoso tse mpe tsa tšebetso.

Ba itse ke ka hona batho ba sa lumelloeng ho qoqa ka nako ea mosebetsi, leha e le ka nako ea lithuto, empa Basotho ba joale ba bonahala e le sechaba se seng se lemaletse meqoqo, ho sa natsoe hore na ba hokae, liphuthehong, liparamenteng, mesebetsing ea liofisi le ea kantle ho tsona.

Ba itse ke e ’ngoe ea lintho tse qabanyang basebetsi ba Basotho le baokameli ba bona ba Machaena lifemeng, kaha Machaena oona a tsitsitse tabeng eo ea ho thola, ho lume mochini feela, puo e be ha motho a hloka ho thusoa ka se amanang le ntšetsopele ea mosebetsi.

Le ha ho le joalo, ho ile ha hlahella hore see e leng semelo sa Basotho, ke ho bina lipina tse amanang le mofuta oa tšebetso ea bona, ee boholo e bang ea matsoho, e kang ho hlaola, ho pola mabele, ho hlasela thota, joalo-joalo.