Bantlafatsi ba Farelane le Seiboko sekiring sa Tšakholo,Mafeteng, ba re ho molemo ho rekisetsoa boea ke BKB

Bantlafatsi ba Farelane le Seiboko sekiring sa Tšakholo,Mafeteng, ba re ho molemo ho rekisetsoa boea ke BKB, ho e-na le ho etsetsoa mosebetsi oo ke Thaba-Bosiu, hobane chelete ee e ba fang eona e nyenyane.

Ea buileng lebitsong la bona, ’Mamoepeloa Mokalake, o re o bua sena hobane ba bone ponaletso tšebetsong eohle ea BKB, boithutong ba bona ba matsatsi a mararo, bekeng ena, ka baka leo, ’muso o amohele kopo ea bona.

Monna oa Pae-lea-itlhatsoa o timela kamor’a ho hlajoa ka lintho tse bohale

Morena oa Sebaka oa Tloutle, Maseru, o re monna oa Pae-lea-itlhatsoa, Ha Lenea, o ile a timela ka mor’a ho hlajoa ka lintho tse bohale ke banna ba Ha-Shale a ntse a hlaola, mathoasong a beke ena.

Morena Mpiti Seeiso Maama, o re tlaleho e fihlileng tafoleng ea hae, e re monna o ne a le masimong a thoteng ea Maphotong, ha ho tla fihla banna ba boletsoeng, ba ileng ba ’motsa lebitso la hae.

O re bao ka mor’a puisano eo, ba ile ba tsamaea le eena, ba potela hona masimong ao, moo ba ileng ba mo nyekenya ka tse seng li boletsoe, ba mo lahlela ka har’a monokotšoai a se a shoele, ba nto inehela sepoleseng.

Banna ba supileng ba chesa ntlo eabo mmelaelloa oa polao ea mok’hanselara, Ha Nchela

Ho bile le tlhaselo Ha-Nchela, moo ho chesitsoeng ntlo ea habo mohlankana ea belaelloang polaong ea mok’hanselara, ba le senuk’heng, khoeling e fetileng.

Morena Mpapa Mohale oa Likorolo Ha-Elia, o re ho banna ba supileng ba neng ba hlasetse lapeng leo, ho tšoeroe ba bane, bao sepolesa se seng se le mehlaleng ea bona.

Sechaba sa Maputsoe se re lefu le se lopollotse ka ho nka monna ee se reng se ne se mo belaella bosholung

Monna ea neng a tumme ka litlolo tsa molao tikolohong ea Maputsoe, ea lulang Ha-Nyenye, Leribe, o ile a thunngoa ke motho ea sa tsejoeng a ba shoa, bosiung ba Labobeli lena.

Mofuputsi oa litaba Sepeka Makoae, o re mofu o ne a tsejoa ka ho utsoa liphoofolo le ho qheketsa likhoebong tse kholo, ’me ka baka la lefu la hae, sechaba sa nyakalla ka le reng se tla ke se phomole.

Lekhotla la mekhatlo ea ikemetseng ea Lesotho e re ha ho letho lee sechaba se ka se lebellang likhanyong tsa sechaba

Sekonyela

Phutheho ea litho tsa Lekhotla la Mekhatlo e Ikemetseng ea Lesotho, e lumellane hore ha ho letho lee sechaba le ka se lebellang likhakanyong tsa selemo sena sa lichelete tsa sechaba, ke phetako ea litšepiso tse sa kang tsa phethahatsoa, tsa lilemo tse fetileng.

Monghali Sekonyela Mapetja o re phuthehong e neng e tlotlisoe ka baeti ba tsoang bonqoseng bo phahameng ba Manyesemane, boemeli ba Amerika le UNDP, litho li itse Letona Moeketsi Majoro o buile puo e sephara feela, e se nang lintlha tse hlakileng malebana le hore na o tla sebetsa joang.

Mohlala o re litho li re, o bile sechele tabeng ea hore na o tla sebelisa bokae ho etsa eng, le hore na o tla nka chelete eo kae. Letsoalo la litho e bile hore ha e le mona a hana ho totobala ntlheng ea hore na o tla nka chelete kae, a ka ’na a nanarela mokotla oa sechaba oa lirisefe, e leng moo mokhatlo o seng o kile oa mo thiba teng.

Monghali Mapetja o re sena e ne e le selemo sa bo leshome le metso e ’meli lekhotla la habo le tšoara phutheho ena, ’me le se le etsisoa ke libanka le ke mafapha a mang a ’muso le a khoebo. O bile o re liqeto tsa bona litla fetisetsoa likomiting tsa paramente tse ikarabelang.

Polelo ea Majoro ea likhakanyo tsa lichelete ke makoko a tšeea ea nku

Minister-of-Finance-Dr-1

Puo ea Sesotho ea Labone lena, e re Polelo ea Likhakanyo tsa Lichelete tsa selemo sena le se tlang, e itšoanela le tšeea ea nku feela ka makoko, ha ho koae koomeng eo, ho omme ho itse ngo!!!!!!

Tsena, ba li buile tlas’a sehlooho se reng “makoko” se ileng sa hlalosoa e le: ho kokomoha, boikhants’o, boikakaso boo ka linako tse ling motho a beng a re o ikhants’a a lapa, kapa a bitsoe mononinyana oa se hana beng, ke ba tenoang ke mekhoa ea hae.

Maele le lipolelo tse etsoang ka lentsoe leo, Basotho ba itse ke: Bocha bo makoko bo ropa pere sebataolong, makoko a moshanyana a fitong la tšea, thokolosi ea moreneng makoko le makoko a moshanyana a lula tšeeng.

Tlhaloso e tsoetse pele ho supa hore le hoja ho e-na le batho ba makoko ka tsoalo, boholo bo kokomosoa ke maemo ao ba leng ho oona, ba sa lemohe hore maemo a ka moholi kapa ’muoane, a fela ka ho panya ha ntši, motho a sala a behile matsoho ka pele.

Lebaka la bona la ho rehella Polelo ea letona la Lichelete ka Makoko a ts’eea ea nku, ba itse ke litšepiso tse sieo, tsee le hloloang ho li etsa, ka lilemo tse tharo tse latellanang, feela ho se letho le qetellang le tsoetsoe ke tsona.

Mokhothu o re likhakanyo tsa Majoro tsa lichelete ke sutu ea khoho

DC LEADER Mokhothu Mathibeli

Moetellipele oa bohanyetsi le lekhotla la Potoana, o re polelo ea likhakanyo tsa lichelete tsa selemo sena, ke sutu ea khoho, ha e ea fetoha le hanyenyane feela ho ea lilemong tse tharo tse fetileng.

Monghali Mathibeli Mokhothu o re ha e re letho ka khoebo le khoebisano e molemong oa bahlahisi le sechaba sa Basotho, e tsoelapele ho ba fetola ’maraka oa linaha tse ling.

A bua ho Rentšalephola la Labone lena, mokhethoa oa Qhoali o itse le monyetla oo Amerika e o fileng Lesotho, oa ho e rekisetsa lihlahisoa tsa naha ena ntle le lipehelo tse boima, ’muso oona o ntse o tsoelapele ho o fetisetsa ho Machaena a sotlang Basotho ka bokhoba lifemeng tsohle tsa Lesotho.

O makalletse ho utloa ’muso o keneng pusong ka ho bolelisaka ka moo o tlang ho fenya bobolu ka teng o sa re letho ka taba eo, polelong ea letona la oona la lichelete ea Laboraro la beke ena.

Lentsoe la hae le ile la reketla ha a bua ka sehloho se etsetsoang Basotho ba kollang ntsi hanong, bao Letona Moeketsi Majoro le itseng lichelete tsa bona li tla sebelisoa ho lefa bo-rankulikae ba fetang sekete, ba kolotoang ke Lechaena la Thaba Bosiu, ha ’muso o ne o lokela ho bolela hore na o se o entse eng ka molotsana eo oa Lechaena hore a lefe Basotho.

Lehakoe la Litaba le butse liatla ho amohela maikutlo a fapakaneng a sechaba holim’a polelo ena, ee mokhethoa oa Qalabane a reng ke Makoko a Letona la Lichelete, a lithoko tsa lona tse se nang mololi oa makhabane a ’Muso oa lephele le baetsana ba oona.

Metsing le Mochoboroane ba ka qosoa joalo ka bohle ka linako tsohle

Selibe Mochoboroane
Moetapele oa Sethala sa Moruo – MEC

‘Maseforo Mahase ACJ, o re Molefi Makara J, o kile a ngola kahlolo e reng batho bohle b’a lekana mahlong a molao, nyeoeng e neng e qholotsa temana ea leshome ea memorandum o neng o re Monghali Mothejoa Metsing a se ke a qosoa ka litlolo tsa molao nakong ea Tlhopho-bocha.

Makara J ea neng a lutse le Mahase ACJ setulong sa boahloli, ba tlatsitsoe ke Semapo Peete J, nyeoeng ea molao oa motheo, moo benghali Mothejoa Metsing le Selibe Mochoboroane ba neng ba re lekhotla leo le kene lipakeng, ba se hapelloe qosong ea teko ea ho liha ’muso, o ile a bala kahlolo eo.

Kahlolo e neng e fanoe likhoeling tse leshome le metso e meraro tse fetileng, e ne e totobatse hore le bona baphaphathehi ba nako eo, ha ba ka holimo ho molao. Ke moo ACJ a ileng a re ho a makatsa hore balli ba tle lekhotleng leo ba kope hore le etsolle qeto ea lona.

Ntle le moo, Makara J o itse ’muso oa Lesotho o ntse o ka ikeletsa, oa fihlela tumellano e kantle ho makhotla a boahloli ea ts’oarelo le poelano e akaretsang bohle, ho balelloa le masole a litlamong, ka ofisi ea ramolao e moholo, molemong oa khotso.

Lekhotla le bile la re ha le na ho ba le bothata, ha e ba nakong e lipakeng tsa ho baloa ha kahlolo, le letsatsi le behetsoeng likhang tsa nyeoe, ramolao e moholo a ka ikeletsa, a nka boeletsi ba lekhotla, a hlophisa tšoarelo e akaretsang,e sa khetholle, e bile e sa thulana le molao oa motheo oa naha ena.

Adv. Napo Mafaesa ea thusang Adv Motia Teele ka lehlakoreng la balli, o itse ba ntse ba tla tsoelapele ka nyeoe ea bona, e tlang ho mameloa mafelong a Tlhakubele monongoaha, ke bona baahloli bao. Mofapa-hlooho o emetsoe ke Adv Shaun Abrahams SC oa Afrika Boroa.

Hona lekhotleng leo le phahameng, Lt Gen Tlali Kamoli, Capt Litekanyo Nyakane le ba bang ba qosoang ’moho le bona ka lefu la Maaparankoe Mahao, ba ile ba hlaha ka khotla hanyenyane, ba tla boela ba hlaha ha Phupu ea monongoaha e tla be e hlola matsatsi a mashome a mabeli. Lifahleho tsa bona li ne li elile.

Palo ea likhakanyo tsa lichelete ka paramenteng

Kamor’a hore ho be le likhang tsa litaba tse fapakaneng ka ntlong ea Sechaba, palo ea likhakanyo tsa lichelete e ile ea fetisoa ke letona la Lichelete, monghali Moeketsi Majoro ka Laboraro lena.

Har’a likhang tseo, ho kenella tšisinyo ea ho hloka tšepo ho tona-kholo, moo bohanyetsi bo neng bo hopotsa motsamaisi oa lipuisano monghali Sephiri Motanyane hore e lokela ho feta pele ho likhakanyo tsa lichelete.

Palong ea Khakanyo ea lichelete, ho bile teng morena Seeiso Bereng Seeiso, bangoli ba makala le baemeli ba linaha.

Litsebi li re lengolo la Peshoane ke tlholo lehlakoreng la bohanyetsi

Lesotho Parliament

Ho baloa ha lengolo la Tsikoane Peshoane oa TRC ka paramenteng, ho nkoa ke litsebi tsa lipolotiki le likhang tsa Paramente, e bile tlholo ka lehlakoreng la bohanyetsi, le hoja Motsamaisi oa paramente a sa lumella ho tšohloa ha lona.

Lengolo le ile la baloa kamor’a hore moetellipele oa bohanyetsi, monghali Mathibeli Mokhothu, a eme ka ntlha ea tsamaiso, a kope monghali Sephiri Motanyane ho honyolla lengolo leo, le ho le balla Lekhotla la Sechaba, botenng ba baemeli ba machaba, ho mametse ho bile ho bona lefatše lohle.

Lengolo le ngotsoeng ke monghali Tsikoane Peshoane oa TRC, la fanoa ofising ea Motsamaisi oa Lipuisano tsa paramente matsatsi a mabeli pele ho letsatsi la ho baloa ha likhakanyo, le na le lintlha tsa bohlokoa, tse latellanang ka mokhoa ona:Ho se fetisoe likhakanyo tsa lichelete tsa selemo sena le se tlang, pele ho boitokollo ba tonakholo.

Bohlokoa ba polelo ea Motlotlehi e etsoang a lutse teroneng ea hae, e supang tsela le ho fana ka morethetho ho ’muso le bohanyetsi malebana le Tlhopho-bocha.

Mosia o bile o re likhakanyo tsa lichelete tsa sechaba ke taba ea bohlokoa haholo. Li lokela ho qoqoa boemong ba puso e tsitsitseng. O re le ha li ka baloa kamor’a likhoeli tse ’ne, ’muso o tla be o ntse o e-na le boemo ba molao ba ho sebelisa lichelete tsa sechaba.

Bahlopholli ba litaba tsa lipolotiki ba re ho tla ba molemong oa sechaba, bohanyetsi le bafuputsi ba litaba tsa lipolotiki le tsamaiso ea puso ho ela lengolo lena la TRC hloko, hobane, ka lona, ba ka tseba ho sala tšebeliso ea likhakanyo tsena morao, le ho supa liphoso.

Khothaletso ea TRC ke hore bohle, ba ka pusong le ba ka bohanyetsing ba thulane ka mahetla ba sebeletse botsitso kahar’a puso pele lichelete tsa sechaba li ka ajoa.

Mokhethoa oa Senqu, Ms Likeleli Tampane, ke e mong oa bao lipolelo tsa bona li tla fetoha lintlha tsa bohlokoa kahar’a hansard malebana le kabo ena ea lichelete. O itse eena o lemoha hore chelete ena e tlilo fetoha mofao oa tonakholo le matona a tla itokolla le eena ka Phupu, joalo ka ha a se a phatlalalitse hore ha a sana matla, o khathetse ke botsofali.