Moqhobi o lematsoa ke banna ba neng ba mo kopile ho mo isa kae-kae

Moqhobi oa koloi ea baeti oa Mapholaneng Ha-Retšelisitsoe, Mokhotlong, o ile a potlakisetsoa sepetlele St. Charles Botha-Bothe, ka mor’a ho hlajoa ka ntho e bohale ke banna ba neng ba mo kopile ho ba isa sebakeng se itseng ka Labobeli lena.

Sena se boletsoe ke mong’a koloi, monghali Atang Ramoloko a re moqhobi o itse o ne a ile a palamisa banna ba bararo le mosali ea ileng a theoha tseleng, bao ba sala ba mo tsohela matla, ba mo hlaba ka ntho e bohale, ba ea ba mo lahlela naha-thote, ba ea ka koloi.

O re moqhobi o ile a phuthoa sebakeng seo, ke mokhanni oa lephele ea ileng a ’mona, ha koloi e utsuoeng ea Toyota Vits e silifera ea linomoro tsa J2829, esale e ea le liinokoane tseo. Tlaleho ka Majara Moshoshoe.