Phoofolo o khalemella Molibeli ho fetola Thabane moshanyan’a lipoli

Holomo-Molibeli
LMPS Commissioner, Holomo Molibeli.

Bahoanti ba reng ba batla hore tonakholo ea naha ena e itokolle hang hang ba hanne ho fana ka lengolo la litletlebo ho letona, ofising ea tonakholo, monghali Leshoboro Mohlajoa ka le reng ke la mochesi oa ’Maesaea, e seng mang kapa mang.

Lengolo leo la litletlebo, le nang le lintlha tse robeli, le ile la balloa sechaba se ileng sa bolelloa hore haele mona tona-kholo a sa ba teng ho tla le amohela, ba khutlela morao, ba sa ilo nka koto,’me ba tla tla ka mokoloko o menahaneng. Likopi tsa lengolo li ile tsa fua bafuputsi ba litaba ba Lesotho le ba machaba.

Litletlebo li eme joana:Tonakholo e ikhirolle pusong hobane ha e hlonephe puso ea molao,’muso oa eona o sotla bo-rankulikae, o tšoarelletse Lechaena khoebong ea lilakha, o nyotobelitse moruo oa naha, matona a fetohile mohlape-moipusi, tonakholo o shatela sepolesa mosebetsing oa sona, o file mohoebi oa lechaena borena le boreki naheng ena. Hape, o furalletse leano la khale la Lesotho la ho ema le ba hatelletsoeng, o rekisitse Lesotho ho batlatlapi ba Morocco. RK.