MoAfrika e fana ka setuloana sa ho qetela se mabili

Mok’hanselara oa Likorolo Ha-Elia, Maseru, o re o leboha qhooa ena ka ho amohela kopo ea hae ea ho fa monna oa motse oa habo ea nang le bokooa ba masapo, setuloana se mabili ho mo nolofaletsa bophelo.

Monghali Hoko Dikiso o re monna eo, o holoba ka mpa fatše, ’me ha e le mona Moafrika e arabile tlhokohali eo ea mantlha, o thabile haholo, hape mong’a setuloana o se thabetse, o se a tla se amohela ka pel’a sechaba sa habo ka Labobhlano lena.

Lebitsong la mabenkele a Express, monghali Paseka Raboshabane ea tumetsoeng ke la Dj Peipi, o re bookameli ba oona bo thabetse see Moafrika FM o se fihletseng ka ho fa batho ba nang le bokooa ba masapo lituloana tseo tse mabili.

Sena ke setuloana sa ho qetela ho tse supileng tse ileng tsa fanoa ke mabenkele a liphahlo tsa maemo a Express, ho Moafrika FM, ka sepheo sa ho kenya letsoho bathong ba nang le tlhoko ea tsona. Tlaleho ka ’Mathabo Chobokoane