Moahloli Hungwe o hanne ho itokolla nyeoeng ea masole

Justice-Charles-Hungwe

Moahloli Charles Hungwe o hanne ho itokolla nyeoeng ea masole a Lesotho a qosoang ka polao ea sehloho ea Lt Gen Maaparankoe Mahao, ka le reng mabaka a ba reng a itlose setulong sa boahloli ba eona ha a utloahale.

Kahlolo e oeleng ka Labobeli la beke ena, e bile ea re paki ea pele e tla kena ka lebokoseng la bopaki ka la Laboraro la beke eona ena.

Hona lekhotleng leo le phahameng la Lesotho nyeoe ea Dr ’Maesaea Thabane, khahlanong le ’Maseterata oa Maseru, moo a qholotsang qeto ea hae ea ho fa mapolesa taelo ea ho mo tšoara, e tla tsoelapele ka Laboraro lena.

Ho keneng ha eona ka Laboraro, ha e na ho mameloa, empa, mahlakore ‘ohle a nyeoe a tla lumellana ka letsatsi la ho e mamela.

’Muelli oa molli, o ne a ile a tekela lekhotla mabaka a hae a ho se itlalehe sepoleseng joalo ka ha lekhotla le ne le laetse. Adv Rethabile Setlojane o itse a mang a mabaka ao, e ne e le ho tšaba, kamor’a hore bookameli bo mo amohe balebeli ba molao bao a neng ba filoe ke sona sepolesa.

Hape, akhente e itse Dr ’Maesaea Thabane o re o ne a ile a bolella mapolesa a neng a mo iselitse lengolo le reng a itlalehe ntlokholo hore mabaka a mosebetsi, a mo petelitse, o tla hloloa ho ea ntlokholo ka letsatsi le nako tse hlahang lengolong la DCP Paseka Mokete, empa taelo ea ‘Maeseterata ea tsoa e sa natse mabaka ao.

Ntle le tsena, phala ea Lekhotla le Phahameng, ’Mabohlokoa Mapikitla o ntšitse polelo e reng ’Maseforo Mahase ACJ, ka laboraro la khoeli e tlang, o tla etellapele mokoloko oa pulo ea lekhotla, ea pele ea selemo, a be a fane ka puo e supang tsela ea tšebetso ea makhotla a Lesotho. Ho tlaleha Relebohile Lengau.