Litaba tsa tonakholo le mapolesa li tšehetsoa ke mangolo a halalelang.

Dr. Thomas Thabane

Moapostola Paulosi o re lintho tsohle li sebeletsa molemo oa ba ratang Molimo le hoja li bonahala li sa ts’oane, athe morena Jesu Kreste eena o kile a lemosa moapostola Peterose hore mohla botsofali bo mo oelang, o tla tlangoa matsoho ke ba bacha, ba mo ise moo ho ratang bona.

Litemana tsena ka bobeli, li ile tsa kenella ha Probono Publico Publici Juris ea Labobeli lena e ne e qoqa ka morero oa tonakholo Motsoahae Thabane oa ho itokolla le ka oa DCP Paseka Mokete oa ho fumana babolai ba Lipolelo Thabane, ’me semphu se mo tlama ho tonamisa ba boholong a bone ea tšoehletseng.

Maikutlo a ile a fapana tabeng ea morero oa boitokollo ba tonakholo, ba re a hle a hate kosene a tlohele ho ’na a re o tla ikhirolla. Bang ba itse polelo eno e lekana ho betefatsa ba neng ba ntse ba mo tšohile, haholo ha a se a ipoletse a se a sena matla, bang bona ba re ke qilo-maqetoha, ramasene molotsana, ba tla re ke lipitsi ha ba li bona.

E mong Tholoana Masupha, o ngotse holim’a marang-rang hore tonakholo ea Lesotho le mofumahali oa eona ba se ba amohiloe tumello ea ho etela linaha tsa Schengen le tsa UK, bophelo bohle ba bona, lebaka e le lefu la Lipolelo Thabane.

Hape, marang-rang a re Dr Motsoahae Thabane o amohiloe le tumello ea ho etela Amerika, empa phala ea boemeli ba USA, Lesotho, e itse ha ba lumelloa ho phatlalatsa litaba tse amang batho ka bo mong ka lebaka leo, ba tla ba sechele le hona tabeng ena.

Linaha tsa Schengen li akha tsa Kopano ea Juropo le tse ling tsa leoatle la Mediterrenean.

Labobeli lena e bile la ho itlaleha mapoleseng a mafokisi, ntlokholo, ha moetellipele oa Manasi, morena Thesele ’Maseribane, ha tonakholo eona e tla itlaleha ka Laboraro lena.

Phala ea Sepolesa sa Lesotho,Supt Mpiti Mopeli, e re morena ’Maseribane o ile a fihla lipotsong, a ba a lokoloha. Hape, Supt Mopeli o tiisa hore Dr. Motsoahae Thabane o lebelletsoe, ka Laboraro la beke eona ena. Tlaleho ka Mohlomphehi Mohlophisi e Moholo.