Lipapali

Phala ea Lesotho Cricket Association, monghali Clifford Molefe, e bua lenaneong la Lipapali ho Moafrika FM ka Labobeli lena, e re ketelo ea cricket Free State Union, Cricket South Africa le Cricket Afrika, e ba tliselitse khaho ea litsi tsa ho bapalla cricket.

O re ba ile ba eteloa ke mekhatlo e boletsoeng, ho ithuta boleng ba cricket Lesotho, ’me ha fihleloa hore ho etsoe litsi tse joalo, moo ba tlang ho qala ka tse hlano literekeng tse ’ne, sa Maseru, Berea, Leribe le Mohalesuku.

O phethetse ka hore tšehetso ea chelete, e tsoa mokhatlong oa Cricket lefatšeng, ICC, ’me tebello ke hore khoeling ea bobeli litsi tse qalang li be li felile.

Hona lipapaling, phala ea LMPS FC, Mosiuoa Lekhooana, o re ba arohane le mokoetlisi Tele Ntšonyane, ’me ba mo lakaletsa mahlohonolo moo a eang.

O re sehlopha se phethetse lipapali tsa leoto la pele ka ho khakhatha Lifofane FC ka likoulu tse peli ho noto, ’me ha nakoana, se ntse se tsamaisoa ke Itumeleng Haleokhoe, Selai Liphehlo le Sheli Ramoseka. Tlaleho ka Majara Moshoeshoe