Thabane o beha lejoe la bobeli tekong ea boitokollo ba hae

IMG_20190416_181047_922

Tonakholo ea Lesotho e behile lejoe la bobeli tekong ea eona ea ho itokolla pusong ea Lesotho, ka ho bua e le ofising ea botonakholo, e potiloe ke balekane ba eona pusong, ha bekeng e fetileng e ne e bua kapel’a litho tsa mokha oa habo eona, e bua sepolotiki.

Ka Lapele lena, e boetse ea phatlalatsa morero oa eona oa ho monyola ka hlooho, botonakholong ba naha ena, e bua e le ofising ea mongoli oa ’muso. Lekhoakhoa le itse lejoe la boraro le tla behoa ka Lekhotleng la Sechaba, mohla le buloang, litaba tsena kaofela li tiisoe ke Lekhotla la Naha.

Dr Motsoahae Thabane o itse lebaka la boitokollo bona ke ho felloa ke matla ao a neng a e-na le oona lilemong tsa ho feta.Ha a fana ka letsatsi le khoeli tsa boitokollo boo.

Maikutlo a Basotho ba hlolang ba buisana le MOAFRIKA ho tloha kamor’a polelo e kang ena kapel’a Makobotata bekeng e fetileng e bile hore, boitokollo boo, haeba ke ntho e tla qetella e etsahetse, bo tla lokela ho lateloa ke ho thehoa ha ’Muso oa Bohlokomeli o tlang ho khannela likhoeli tse ka bang tšelela feela,ho nt’o kenoa likhethong tse tla beng li laoloa ke Molao oa Tlhophobocha.

Basotho ba phelang kantle ho naha, ho ea kena naheng tsa mose ho maoatle, ba re ba leboha bookameli ba se-ea-le-moea sena ka ho ba phatlalletsa polelo ea tonakholo ka khaso e otlolohileng, e hlakileng.

Ho sa le joalo, Basotho ba tšoenyehileng ba mekhahlelo eohle, ba tla ba mohoantong ka Laboraro la beke ena, o tla beng o isa lengolo ho tonakholo, Lekhoakhoa le ikhirolle, le sebelitse ho lekane, etsoe puso ea lona e baketse naha ena le sechaba sa eona tlala, tlhobolo litlolo tsa molao le litsikitlano tsa meno.Tlaleho ka Tabane Sebonomoea Ramainoane.