Semathi sa lesotho boemong ba machaba, se timetse

Motlatsi oa Phala ea sehlopha sa Lioli FC, Motlatsi Mofokeng, a bua lenaneong la Lipapali ho Moafrika FM ka Lapele lena, o re ba itlhakotse likeleli ka ho patlotsa sehlopha sa Lijabatho FC likoulo tse peli ho e le ’ngoe, Maputsoe, mafelong a beke e tsoa feta.

Mofokeng o re ba bile ba bula lekalana la sehlopha hona Maputsoe, ’me ba fumana litho tse 19, ba ba ba hlahisa libapali tse ncha tse tsoang Afrika Boroa, e leng Thato Sefali le Luciano Matsoso. 

Ho sa le joalo, Phala ea Lesotho Athletics Association ebile ele mothehi oa Khubetsoana Athletics club, monghali Sejanamane Maphathe, o re lipelo tsa bona li bohloko ka tahlehelo ea semathi boemong ba Machaba.

Tšepang Ramonene o tlalehoa ke eena Monghali. Maphathe, a hlokahetse kamora bokulo bo bokhutšoanyane ka Moqebelo oa beke e fetileng. Bophelong ba hae o tlalehoa a ile a ipabola ka ho hapa Mandela Marathon ea 42.2 kilometeres, ka mongoaha oa 2015, ’me o hlakahala tjena talenta ea hae e bonahala e ntse e ntlafala haholo.

Ha re lekola lefapha la lipapali moketeng oa Moafrika, o i’lo ba Van Royen, Ha Ralintši, Mafeteng, mohokahanyi lefapheng leo, ’Mabakoena Setenane, o re har’a tse ling, ho tla ba teng mokhibo, setepe sa k’horiana, lesiba, sekhankula, lihoba tsa Likokong, lipere, likhomo le nthufe.

O re tlhopho ke hore lipere, likhomo le nthufe, li tla bapala ka Labohlano, ha tse ling li tla ba ka Moqebelo. Ho tlaleha Majara Moshoeshoe.