Monna o re o khathetsoe molato oo eseng oa hae, Mokhotlong

Monna oa Mapholaneng Motete Ha-Retšelisitsoe Sekonyela, Mokhotlong, o re o khakhathiloe hampe ke monna oa motse oo, ee a reng o ’melaella le e mong bosholung ba linku tsa hae mashome a mararo, mafelong a beke e fetileng.

Monghali Likhapha Maimane, o re o ile a etselletsoa ke monna ea ileng a fumanoa ke mong’a linku, eo a itlhalosa a li nkile ho eena, ’me a ba isa ha hae, moo a ileng a ba bolaisa melamu, kubu le ketane.

O re o ile a ba lokolla ka le reng, motho ka mong, a mo lefe likete tse hlano tsa Maloti le linku tse robeli, ’me o li lebelletse ka Labohlano lena, ho feta moo, lelapa le se le tla hlopha litaba tsa ho ea bula nyeoe ea ho khakhathoa.

Lehakoe la Litaba le hlotsoe ho fumana monna ee ho lluoang ka eena hobane ho sa tsejoe linomoro tsa hae, empa o ntse a buletsoe mamati ho teka lehlakore la hae, litabeng tsena. Tlaleho ka Mohlalefi Kokoropo