Monna o lla ka lekhotla le mo phethisitseng nyeoe e sa buuoa, Matšonyane.

Monna oa Mantšonyane Ha-Long, Thaba-Tseka, o re lekhotla la Mathomo la Mantšonyane, le mo phethisitse likhomo tse supileng le tonki, ka le reng o ile a hana ha le mo phethisa pejana, ka ho boloka pere ea e mong oa baahi ba sebaka seo, e ileng ea tsoalla ha hae lilemong tse hlano tse fetileng.

Monghali Tjobolo Ramokhosi, o re sena se latela hore moamani le eena a lefelle Sekete, lipere tse mashome a mararo a metso e supileng, ho balelloa le e neng e emere, ea ileng a e kopela ho phomola ha hae, athe e tla tsoalla teng, ’me e bile ho eena matsatsi a mahlano.

O re ke moo ho ileng ha fihla banna ba babeli ha hae ba re pere eo ke ea bona, eena a se ba hanyetse haese ho ba bolella hore, o tla e lokolla ha motho ea e siileng ho eena a le teng, ’me taba eo, ea se ke ea ba khotsofatsa.

Monghali Tjobolo, o re banna ba ile ba tlaleha litaba tsa pere sepoleseng, sa mo laela ho ea le pere le petsana, ha seke ha uoa khotla, ea lokolloa ke mookameli oa sepolesa sa Mantšonyane ka nako eo.

O re selemong sa botšelela, beng ba pere ba re ba ’matla matšeliso a hore e tsoalletse ha hae, ba ea kenya nyeoe lekhotleng le ileng la mo fa samane, eaba e ntse e checha, le tokete ea nyamela, empa lekhotla la be le se le mo phethisa ka Pulungoana ea ngoahola.

O re o bile a ea lla lekhotleng la ’Maseterata oa Thaba-Tseka, le ileng la mo kopanya le ba lekhotla la Mathomo la Mantšonyane, tumellano ea e-ba hore a fuoe liphoofolo tse peli, ha ho ntse ho lelekisanoa le tse setseng tse tšeletseng. Tlaleho ka ’Mathabo Chobokoane