Molula-setulo oa Mokhatlo o buellang litokelo tsa batho ba tlokotsing, o re ke bothata ho fumana bosebeletsi lekaleng

Molula-setulo oa Mokhatlo o buellang litokelo tsa batho ba tlokotsing, o re ke bothata ho fumana bosebeletsi lekaleng le shebaneng le boiketlo ba sechaba, ha le lokela ho sebetsa litaba tsa tlhekefetso tsee le li nyenyeletsoang ke ba li bonang.

Nkhono ’Mamokete Sebatane, o re mokhatlo oa habo o ne o ile oa nyenyeletsoa litaba tsa ngoana oa moshanyana ea lilemo li hlano ea hlekefetsoang ke se-thiba-mathe sa ntat’ae se lulang se mo khaila, se mo tima lijo le ho mo koalla kantle motšehare ha se ilo phetha mabaka.

O re kamor’a ho nyenyeletsoa, ho ile ha kopanoa le mafapha a amehang litabeng tsena, ka sepheo sa ho fumanela moshanyana tharollo ea moshoelella, hore a mpe a isoe lehaeng le hlokomelang batho ba mofuta oo ho pholosa bophelo ba hae, empa boriki ba e-ba teng ka lekaleng.

O re Lekala le se le tlolisa khati mafapha a le etselitseng mosebetsi oa ho le fupuletsa taba eo, ’me mokhatlo o ntse o tsoelapele ho kokota ho lona, ho utloa seboko sa oona hore moshanyana a thusoe ka potlako. Tlaleho ka ’Mathabo Chobokoane