Matsatsi a supileng ao Compol e a filoeng ho fana ka mabaka a ka thibelang teleko ea hae a feletse ka Labobeli lena

Holomo-Molibeli
LMPS Commissioner, Holomo Molibeli.

Matsatsi a supileng a ileng a fua mookameli oa sepolesa sa Lesotho, Compol Holomo Molibeli, a ho fana ka mabaka a ka thibelang tona-kholo Motsoahae Thabane ho eletsa Motlotlehi hore a mo leleke a felletse, ka Labobeli lena, ho rialo ba tsebang ho bala matsatsi ao se-molao.

Ka lebaka leo, ba re sechaba se se se ka lebella ho utloa tonakholo e re e khotsofalitsoe kapa ha e ea khotsofatsoa ke likarabo tsa Mr Molibeli.

Haeba ho ka fumaneha mabaka a sa kholise tonakholo, litsebi tseo tsa molao oa motheo le molao o laolang sepolesa sa Lesotho, li re sechaba se ka boela sa lebella ho bona tonakholo e hlomamisa Compol e ncha kapa motšoareli, ka kasete ea molao. Phala ea ’muso oa Lesotho, ha e e-s’o re letho ka taba ena.