Ntlokholo ea sepolesa e amohile Dr ’Maesaea tšireletso ea molao ea linako tsohle

Dr. 'Maesaeah Thabane
Lesotho first Lady, Dr. ‘Maesaeah Thabane

Dr ’Maesaea Thabane o amohiloe tšireletso ea molao ea ka linako tsohle ke ntlokholo ea sepolesa sa Lesotho, ka Labohlano lena, ho sa fanoe ka mabaka, ho rialo mehloli e haufi le lelapa la tonakholo ea Lesotho. 

Sena, se hlalosoa se latela hore hlooho ea mafokisi a naha ena Adv. Paseka Mokete, e bitsetse Lepelabasali lipotsong tse malebana le lefu la sehloho la Lipolelo Thabane, mosali oa tonakholo oa pele ho morali oa Batloung. 

Maikutlo a fihlileng ho Lehakoe la Litaba la MOAFRIKA kamor’a Hora ea Litaba, a itse na ho tla joang hore mapolesa a khorohele mosali eo oa motho, a e-s’o tšoare babolai ba khalitso ea hae, etsoe a ba tseba hantle. Ho feta moo, a re na ha e ka pitso eo e bile e tsamaea le hore a tsekisoe bolebeli ba sepolesa ba linako tsohle, na e be ho habiloe kae. 

Beng ba maikutlo ba itse Team Holomo Molibeli e kene ofising, mookameli oa pele ho eena, Compol Molahlehi Letsoepa a ne a se a entse mosebetsi o moholo lipatlisisong tseo, ea ba moo bookameli bo bocha bo qhalang Team Letsoepa, e ileng ea tsamaea e siea tokete e kokomohileng haholo ea lipatlisiso tsa lefu leo. Ho tlaleha Morena Sebonomoea Ramainoane.