Nyeoe ea Holomo Molibeli e tla tsoelapele ka Labone la beke ena

Holomo-Molibeli
LMPS Commissioner, Holomo Molibeli.

Mahlakore ohle nyeoeng ea bobeli ea monghali Holomo Molibeli a lumellane hore a tla tsoelapele ho ngangisana holim’a nyeoe ea bobeli ea mookameli eo oa sepolesa sa Lesotho, ka Labone la beke ena ka hora ea boraro mantsiboea.

Ke nyeoe e malebana le pehelo ea hae ka thoko ho mosebetsi e ileng ea etsoa ha khoeli ena e ne e hlola matsatsi a mararo.

Lehlakore la ’muso le ne le ile la fihla khotla le se boemong ba ho bua nyeoe eo, ka Laboraro lena, la kopa matsatsi a mangatanyana a boitlhopho, empa kamor’a ho buela ka liphaphosing tsa moahloli Tšeliso Monaphathi, bohle ba lumellana hore e tsoelepele ka letsatsi le hlahlamang.

Ka mokhoa o joalo, lehlakore la ’muso le amohetse hore pehelo ka thoko ho mosebetsi ea Compol, e neng e ile ea etsoa pele, e ne e se molaong, e lahloe, ho kenoe ho ea bobeli, e leng e lokolisitseng mabaka a pehelo ka thoko eo.

Moahloli o itse o soabile haholo hore e be ofisi ea ramolao e moholo ke eona e sisinthang kabong ea toka, ka ha a ne a lumela hore e na le sohle se hlokahalang ho hlopha likhang tsa lona nyeoeng ena.

O bile a re nyeoe ena ke ea bohlokoa haholo ho latela hore e amana le tšireletso ea naha le sechaba sa eona.A re ho bonahala ’muso o tšoere litaba tseo ka bobebe bo kang hoja o tšoere lesiba la nonyana.Tlaleho ka Relebohile Lengau.