Moetellipele oa Bohanyetsi o re tonakholo Thabane a itokolle

Moetellipele oa Bohanyetsi o re tonakholo ea Lesotho e lokela ho itokolla, e hlotsoe ke puso.

Tsena, monghali Mathibeli Mokhothu o li buile nakong ea Hora ea Litaba ka Labobeli lena, a komela litaba tse reng, mookameli oa sepolesa san aha ena o kene ofising ka khang empa Lekhotla le Phahameng le mo laetse hore a tsoe a ntse a le kantle ho eona, a emele hore litaba tsa pehelo ea hae kantle ho ofisi li qetoe ke lona lekhotla leo.

Motaung o bile a supa hore botonakholo ba Dr Motsoahae Thabane e sa le bo le manothoko ho tloha ha a ne a qala ho kokomala sa maratsoana, ka selemo sa 2012. O itse pusong ea Lekhoakhoa mafapha a ts’ireletso a lula a hohlana, ’me o ile a le jarisa lekoko la lefu la Maaparankoe Mahao.

Mohlopholli oa litaba tsa lipoloti le tsireletso, tsa Lesotho, Bokang Kuoane Ramats’ella, le eena o ile a matha hona moo monghali Mathibeli a tsamaileng teng, a ’na a beha molato holim’a tsamaiso ea puso ea tonakholo ea naha ena.

Lehakoe la Litaba la MOAFRIKA le ntse le emetse ho utloa lehlakore la ’muso malebana le litaba tsena. Le hlotsoe ho fumana phala ea ’muso, monghali Thesele ’Maseribane, letona la likhokahanyo.

Litaba li ne li thehelletsoe holim’a lengolo la Supt LJ Shale le eang ho bookameli ba mafapha ohle a sepolesa sa Lesotho, le a tsebisang hore Monghali Molibeli o khutletse ofising, le hore monghali Sera Cedric Makharilele o boetse ofising ea hae ea DCP – SMSS.

Liofisiri tsa sepolesa tse sa batlang ho boleloa ka mabitso li ne li ile tsa lemosa Lehakoe la Litaba la MOAFRIKA hore boemo bo ntlokholo bo bobe, litšebeletso li khinehile, boholo ba liofisiri bo itlhekile ha bo bona lithunya tse kholo li se li shebisoa ka ho ea neng a ntse a tšoere molepo.

Eena oa ntekatekane eo oa maka oa leshano, o itse molaoli oa sesole sa Lesotho o bile teng ntlokholo ea sepolesa, phuthehong le mookameli ea tšoarisitsoeng molepo le ea phomolitsoeng, empa ha a na leseli la hore na lipuisano li tsamaile joang.

Lt Col Mashili Mashili oa liphatlalatso tsa Sesole sa Lesotho o bolelletse Lehakoe la Litaba la MOAFRIKA hore bolaoli ba LDF bo ile ba laeloa ho ea rarolla khang e neng e le lipakeng tsa DCP Makharilele le Compol Molibeli, moo ba khutlileng ho sa ba le tharollo.

Oa ntekatekane oa maka oa leshano eena o re tharollo e fihletsoeng e itse DCP Paseka Mokete e be eena motšoareli, DCP Makharilele le Compol Molibeli ba emelle ka thoko ho fihlela ho bile le tharollo ea lekhotla le phahameng.

Letona la Sepolesa le Polokeho ea Sechaba,monghali Lehlohonolo Moramotse le re se entsoeng ke Compol Holomo Molibeli ha se ananeloe ke ofisi ea hae, ho hang, le mpa le phathahantsoe ke tokisetso ea phupu ea mosali oa lona bakeng sa ho nama ka litaba tsena.