Monna o re o utsoelitsoe koloi ka likhoka ke banna ba babeli tseleng e lebang Ha-Makhoati, ka mor’a hore a letsetsoe ke monna ea ileng a mo kopa ho mo isa sebakeng see ho neng ho utloahala a sa se tsebe hantle ka Labohlano lena

Monghali Nkopane Molahli e le moqhobi oa koloi eo, o re ha ba fihla tikolohong eo, ba kopana le monna ee itseng ha ba ntse ba batla tataiso ho eena, eaba moo ba mo hlaselang ka kopanelo le eena eo.

Molahli o re ba ile ba mo fasa maoto le matsoho hammoho le molomo, ba ea mo lahlela ho mong oa metse ea Thaba-Bosiu, oo a sa o tsebeng, ’me ba utsoitse sepache se tšetseng karete ea boitsebiso ea naha, ea ho qhoba, liborele tsa mahlo le chelete

Koloi ke Honda Fit e ntšo ea nomoro ea nakoana ea RX 262, e mengoapo kaholimo ’me bambara e kapele e ebohile. Sepolesa sa Ha Thamae se tlalehetsoe ka ketsahalo ena.

Boemo bo neng bo rena ba ntoa e neng e le lipakeng tsa lihlopha tse peli tsa likobo Mapholaneng, Mokhotlong bo ile ba behoa taolong ke sepolesa sa Mapholaneng ka kopanelo le sa Mokhotlong hammoho le sesole, ka Labohlano lena.

Motlalehi oa litaba tsena Mokhotlong, monghali Mohlalefi Kokoropo o re tsena li etsahetse letsatsing le boletsoeng, moo ho ileng ha pshatloa koloi le ho hlahisa mong’a eona likotsi, oa sehlopha sa Seakhi.

Phala ofising ea Liphatlalatso ea sesole sa Lesotho, Lt. Cnl: Mashili Mashili e itse masole a kene taba ena kamor’a ho mengoa ke sepolesa qabanng eo ea Khang-kholo le Seakhi e le lihlopha tsa likobo.

Phala ea sepolesa, Supt Mpiti Mopeli e tiisitse litaba tsena ka hore sepolesa se ile sa kopa tlatsetso ho sesole.

Basotho ba bapisa NRA le IPA

Bamameli ba Pusong ea Sechaba ka Sechaba ea Labotšelela lena, ba bapisitse National Reforms Authority e thehetsoeng ho hlahloba le ntlafatsa molao oa motheo oa naha ena le Interim Political Authority e ileng ea thehoa ka 1999 ho tlisa botsitso lipolotiking tsa Lesotho, ha bohanyetsi ba ka nako eo, bo ne bo hana sephetho sa likhetho tsa 1998.

 

Lenaneo le fumane hore phapano e teng lipakeng tsa makhotla ana a mabeli, NRA e thehiloe ka makhotla a lipolotiki le mekhatlo ea sechaba, ha IPA e ne e thehiloe feela ka makhotla a lipolotiki le karolo ea ba pusong.

Taba e ’ngoe ke ea botlalehi ba litaba tsa tšebetso, NRA e tlangoa ke molao hore e ’ne e behe Basotho leseling ka mesebesti ea eona, pele e ka fana ka tlaleho e feletseng, ha ho se ho phethetsoe tšebetso.

Ntlha ea bobeli ho tsena tse peli, Basotho ba bile ntsoele-leng hore MOAFRIKA FM, ka Lenaneo la Pusong ea Sechaba ka Sechaba e lokela ho sebelisoa ke NRA ho fa Basotho litlaleho tsa mosebetsi oa eona.

Litho tsa lekhotla lena la Tlhopho-bocha li tla hlapantšoa ka la botšelela la khoeli ea bobeli, selemong sena, ’me le qale mosebetsi oa lona hang hore ho be joalo.

Letona la Sepolesa le re mafapha a Sechaba a kopane

Letona la Sepolesa, le re ke nako ea hore mafapha ohle a sechaba, a ke a kopane molemong oa thabo ea oona, a tlohele ho sokelana ka litaba tsa lipolotiki a bope khotso, joalo ka ha Moafrika e a kopantse.

Monghali Lehlohonolo Moramotse, o buile tsena har’a matšoele a neng a khobokane moketeng oa pitiki ea Moafrika Fm, o neng o tšoaretsoe Fanroi Ha-Ralintši Mafeteng, ka Labotšelela lena.

A re o thabetse see Moafrika FM e se entseng sa ho khobokanya sechaba sa Basotho nqa e le ’ngoe ka sepheo sa hore se thabe hammoho, ka baka lena, eena ha a sa tla sala ha qhooa ena e eta.

Koloi e phatloha mabili tseleng ee ba e palamemng ba il’o batla setopo sa setho sa lona

Letšolo la ho batla setho sa lelapa la Lekhoakhoa see esale se noela nokeng ea Mohokare mahareng a khoeli ena, le thisisitsoe ke tlhokahalo ea thepa ea tšebetso ka baka la ho taboha ha mabili a mararo a koloi e neng e ntse e sebelisoa.

Monghali Teboho Lekhoakhoa, o re ha boemo e le bona, lelapa le selebaletsoe hore le se le tla tsoa ka lefe lekhalo ho fumana masapo a ngoana eo oa lona le tle le ’moloke, ho feta moo o leboha bohle ba emeng le lona tsietsing ena.

Tsena ke tatello ea litaba tse ileng tsa fihla Lehakoeng la Litaba bekeng e fetileng tse neng li re ho na le moshanyana ee esale a noela Mohokare a ne a e-na le ba bang, ba ileng ba hlabela sechaba mokhosi.Tlaleho ka ’Mathabo Chobokoane

 

Monna oa Ha-Leboea Botha-Bothe, o tšoaroa ka pelalello ea ho beta morali oa hae

Monna oa Ha-Leboea Botha-Bothe ea kabang lilemo li Mashome a Mararo, o litlamong tsa sepolesa ka pelaello ea ho beta morali oa hae ea lilemo li leshome le metso e ’meli,ka Laboraro lena, ho rialo mok’hanselara oa motse oo.

Monghali Makoanyane Potjo o re ’m’a ea monna ea boletsoeng, o itse o fumane tlaleho ka setloholo sa hae hore ntat’a sona o se betile, empa monna a itatola ka le reng o se shapile feela.

Monghali Potjo o re ha khang e se e le teng, o ile a bitsa basali ba baholo ho hlahloba ngoananyana, ba fumaneng hore ketso e entsoe ho eena, hang ha tsebisoa sepolesa sa Botha-Bothe se ileng sa qhautsa ’melaelloa, ea boletseng a ne a kenoe ke satane.

O re ho latela lipatlisiso tsa sepolesa, ho fumanehile hore lena ke lekhetlo la bobeli monna a etsa ketso eo ngoaneng, ’me taba eo lelapa la e hata ka maoto empa ngoana a kile a e tlalehela nkhono oa hae, joale le eena ha a bitsetsoa sepoleseng, o se a meneka. Tlaleho ka Chitjanyane Teanye

 

Tlhokahalo ea chelete ea mafura e khina kabo ea toka naha ka bophara

Ke beke ea bobeli litšebeletso li khinehile makhotleng a bo-’Maseterata naha ka bophara ka lebaka la tlhokahalo ea chelete ea ho noesa makoloi a Lekala la Toka.

Ofisiri ea liphatlalatso ’Mampota Phakoe o re, makhotla a hloloa ho sebetsa kaha likoloi tsa oona li eme, ha ho mokhoa oa ho isa thepa ho ’ona. O re maemong a mang Bommaseterata ba ikotla lipokotho molemong oa tšebetso.

Ka ho tšoana ofisiri ea liphatlalatso Setsing sa Tlhabollo ea Batšoaruoa Sinior supt: Neo Mopeli o re, setsi se maqakabetsing a tlhokahalo ea mafura ka hona batšoaruoa ba hloloa ho ea liremanteng,’me sena se ba amohile tokelo ea ho tlalehela makhotla litletlebo tsa bona le likopo tsa beile, ’moho le khatelopele linyeoeng tsa bona.

Letona Semano Sekatle le itse tlhokahalo ena ea mafura e amme naha ka bophara ka ha ’muso o hlolehile ho lefa mokoloto oa k’hampani ea mafura, Lekala le ntse le kopa tlatsetso ea lichelete makaleng a mang. Tlaleho ka Relebohile Lengau

Mohlomphehi Mohlophisi e Moholo o amoheloa ka litlatse Qalabane, Mafeteng

E bile thabo e kholo ha ho amoheloa Mohlomphehi Mohlophisi e Moholo ka hare ho setereke sa Mafeteng sebakeng sa Qalabane, ka Labohlano lena, le hlohonolofalitsoeng ka pula.

Sebakeng sa Qalabane, ho ile ha phetoa nalane e khutšoanyane, moo Mohlomphehi Mohlophisi e Moholo, litabeng tseo, o bile a bontša hore lena ke lekhetlo la bobeli Moafrika FM e hata mobu oa moo.

Ho feta moo, Mohlophisi e Moholo, o ile a kalla koatola har’a melilietsane e thibang letsatsi ho leba moo lipitsa tsa teng li seng li ntse li ptjatla, hantle Fanroi Ha-Ralintši.

Letsatsing la Moqebelo teng, ho tla ba le lipapali, mokhoro oa Litotla le libini,’me sechaba se se se tla ikaba hore se ikela lefapheng lefe etsoe nama le lebese li le pel’a sona. Tlaleho ka ’Mathabo Chobokoane

Matlama Fc e tekenetse libapali tse tharo ho ntlafatsa sehlopha

Phala ea Matlama FC e re sehlopha sa habo eona se tekenetse libapali tse tharo, ka sepheo sa ho se ntlafatsa,’me tsona ke Thapelo Tale, Desere Holomo le Thato Rantšo.

Monghali Tankiso Moletsane, o bile a re sehlopha se alimane ka libapali tse ling e leng Thabo Ramakoa le Rethabile Moroeroe. 

Ho feta mona phala ea mokhatlo oa Rugby Lesotho, monghali Morapeli Motaung, e re mafelong a beke ena, ho tla be ho khakoloa league ea banna ea lihlopha tse tšeletseng tse tlang ho bapalla Makoanyane. 

Monghali Motaung o re sehlopha sa Giants se tla isana holimo le tlase le sa Roma Kings, athe Maseru Warriors e tla nkana le Mabote Beavers, ha NUL Spears,e tla bapala le LDF Liqhomane. Tlaleho ka Majara Moshoeshoe.