Bamameli ba Re Nyebekolla Taba ba thusa monna ea lemalitsoeng ke bakh’othotsi, Quthing

Monna oa Mphaki Ha ’Mabathepu Mohale Quthing,o re o leboha bamameli ba Qhooa ena ba seng ba kentse letsoho ho mo tšella bohashana, kopong ee a e entseng ho bona a tle a e’o lefella hore a e’o sebetsoa letheka le robehileng ka mongoaha oa 2002.

Monghali Moeti Kotelo o re o ne a oele ka sanketse nakong ee a neng a thunngoa tlas’a letsoele la lehlakore le letona, ke bahlaseli ba hae ba babeli ba bileng ba mo k’hothotsa, tsee a neng a li rekile kaha a ne a e-tsoa merafong RSA.

Kotelo o re esale e le ka nako eo ho fihlela joale o ntse a e-so fumane thuso ka lebaka la bohloki ba chelete e likete li hlano tsa Maloti. 

Mokhethoa oa Puso ea Libaka monghali Khabutlane Sekese, o re ba ntse ba leka ho thusa monna eo hore a fumane mokhoa oa ho qala khoebo ea lihlahisoa tsa matlalo, kaha a ithutetse hona, empa ha ba e-so atlehe.  

Le ha hole joalo Lenaneo la Re Nyebekolla la Labohlano lena le ntse le tsoela-pele,monghali Kotelo o ile a kena a se a ntse a leboha bohashana boo bamameli ba neng ba ntse ba mo fa bona,‘me ho bile le emong ea ileng a ts’episa hore o tla mo rekela letlalo le tse ling tsee a tla qala mosebetsi ka tsona le e mong ea itseng ba ntse ba ipuoa hore ba kenya letsoho joang.