Baahi ba Thaba-Bosiu ba lokolloa ka beili, ke lekhotla la ’Maseterata la Maseru

Baahi ba bahlano ba Thaba-Bosiu Ntlokholo, ba lokollotsoe ka beili ke lekhotla la ’Maseterata la Maseru ka Labone lena ba qosoa ka ho kena-kenana le peipi ea metsi a letamo la Metolong.

Bopaki bo re ka la 13 Tšitoe haufi le Ha Sepake Thaba-Bosiu ka kopanelo, sepheo le morero, Ramorontši Ntaote, Thabo Bob, Mokhethi Bob, ’Maphala Khoete le Moramang Makumi, ba bakile tahlehelo ea metsi ka ho phunya peipi ea metsi, a hakanyetsoang chelete a kaholimo ho likete tse mashome a mahlano tsa Maloti.

Lekhotla ka ’Maseterata Qobolo le lokollotse moqosuoa ka mong ka beile ea sekete sa Maloti, motho ka mong. Baqosuoa ba tla hlaha khotla hape ka 27 Tšitoe. Mochochisi ke Phooko.