MoAfrika e nehelana ka setuloana se mabili ho mosali ee Lekala esale le re a behe pelo sekotlong

Moahi oa Mikaeleng Ha Pasane, Manonyaneng, ea nang le bokooa ba masapo, o re o leboha Moafrika FM, ka ho mo abela setuloana se mabili, hoja a ne a se a e-na le lilemo tse tharo, a se kopile lekaleng, karabo e le beha pelo sekotlong, u tla thusoa.

’Mamakhotla Fosa ea lilemo li mashome a tšeletseng, o re bokooa boo, bo ne bo mo qale kamor’a ho sebetsoa ke lingaka tsa Queen II, a le lilemo li leshome le metso e ’meli,’me setuloana sena ke sa bohlano, nakong ea lilemo tse ka bang mashome a mahlano, a holofetse.

’Mamakhotla o re o ne a se a lahlehetsoe ke tšepo ea hore o tla qetella a fumane thuso ea hore a tsebe ho iketsetsa letho, hoja e se ka qhooa ena, ka ho mo nea setuloana seo le morena Masekoane Pasane, ea mo etselitseng lengolo le mo fumanetseng thuso.

Setuloana sena ke sa tse ling tsee Moafrika e li abetsoeng ke lebenkele la liphahlo la Express hore e phallele bahloki ka tsona.