Sechaba sa Koalabata Kopanong se re toka e ajoe ho babelaelloa ba polao ea monna oa motse oo

Morena oa Koalabata Kopanong Ha-’Makhomo Makoanyane o re o ile a bua le sechaba sa hae se neng se jele masooko hore se seke sa ikukela molao matsohong ka baka la lelapa le belaelloang polaong ea monna oa motse oo, ee le e entseng ka Lapele la beke ena.

Morena ’Makhomo Mokoanyane, o re sena o se bua a ipapisitse le litaba tse fihlileng Lehakoeng la Litaba tse neng li re baahi ba motse oa hae, ba batla ho bona toka e phethoa holim’a babelaelloa ba ketso e boletsoeng.

Ea itšebileng le Lehakoe la Litaba, o ne a ile a le bolella hore sechaba se ne se ile sa hlabelana mokhosi oa hore ho na le monna ea ntseng a khakhathoa lapeng le leng, o tsekisoa hore o utsoitse metsi a ho noesetsa.

O re sechaba se fumane monna a tlanngoe sekolokoto a suntsoe sekatana ka hanong, sechaba sa mo fasolla, sa ba sa mo potlakisetsa sepetlele, a mpa a timella tseleng. O re Sepolesa sa Ha-Mabote se ile sa fihla sebakeng sa ketsahalo, sa nka litho tse peli tsa lapa leo, tse belaelloang lefung leo.