Molula-setulo oa Farelane le Seiboko o balletsoe liqoso tsa bosholu ba chelete, Lekhotleng la ‘Maseterata, Maseru

THINYANE
Lesotho Wool and Mohair Growers Association (LWMGA) Chairman, Thinyane Mokoenehi

Molula-setulo oa mokhatlo oa Lesotho oa Farelane Le Seiboko, o balletsoe liqoso tse peli tsa bosholu ba chelete e ka holimo ho limilione tse leshome le metso e meraro ea Lekala la Temo la naha ena, ke Lekhotla la ’Maseterata oa Maseru Ka Labobeli lena.

Mokoenehi Thinyane oa Senqunyane Ha Hlabathe Semonkong, o hlalosoa ke lekhotla a ile a ikhapela chelete ena haufi le banka ea temo lipakeng tsa 2006 le 2011, a tseba hantle hore ke ea ’muso oa Lesotho.

Qoso ea bobeli e re lipakeng tsa 2012 le 2017 eena Thinyane o khelositse ka sepheo le morero chelete e lekanang, e huloang ho sehoai ka seng ea tipi, ka ho e isa Mokhatlong o moholo oa lihoai tsa Farelane le Seiboko Lesotho.

‘Muelli oa moqosuoa, Attorney Qhalehang Letsika, o itse o makalletse nyeoe ea mofuta ona, ’me o malala a laotsoe ho etsa likhang holim’a eona, ka hona o tla sebetsana le eona ha nako e fihla. Moqosuoa o tla hlaha khotla ka la 14 Pherekhong isao. ’Maseterata ke Thamae ha mochochisi e le Lebohang Hlaele.